رائد وصل للمخزن اللي طلب مريم تكون فيه 

فلقا رجالته واقفين ع الباب فقال

ها ايه الاخبار هي فين 

الرجالة 

جوا يا باشا زي ما طلبت احنا مقدرناش نمشي من غير ما ترجع وتتأكد بنفسك.. اي اوامر تانية يا باشا؟؟ 

رائد طلع فلوس من جيبه وعطاهم ليهم وقال 

لا كدا فل اوي يلا روحوا انتوا خلاص كدا يعتبر مهمتكم انتهت لما احتاجكم اكيد هتواصل معاكم. 

وبسرعة رائد دخل الاوضة ودور بعينه ع مريم 

اللي كانت خايفة ومنزوية ف ركن من اركان المخزن جنب الكراتين وبتترعش 

رائد ابتسم بتفشي 

ياااه واخيرا لقيتك.. ايه مالك كدا عاملة زي الفرخة العيانة وكشة ف نفسك كدا .. اللي يشوف كدا ميظنش ابدا انك بنت اكبر نصاب وحرامي ف البلد.. ايه يا كتكوتة عايزة تقنعيني انك مش شبه ابوكي وانك خايفة فعلا.. يا شيخة دا انتي دوختيني لحد ما لقيتك بس بجد طلعتي استاذة ف الهروب والاختباء انا رجالتي حفوا علشان يلاقوكي.. عملتيها ازاي .. ولا اكيد تربية ابوكي فطبيعي تطلعي زيه 

مريم ببكا حاولت تستجمع شجاعتها 

انت عايز مني ايه انت جايبني هنا ليه وبأي حق.. دا اسمه اختطاف وانا هوديك ف ستين داهية 

رائد ضحك 

ههه اعلى ما في خيلك اركبيه يا امورة انتي .. اللي عندك اعمليه بس اللي عايزك تعرفيه اني مش هتنازل عن حق ابويا... ابويا مش هيموت فحسرته وانتوا الكلاب بتتهنوا بفلوسه وبترقصوا على موته ولا كأنكم بشر .. انتم شياطين في صورة بشر.. بس انا للاسف مش زي ابويا.. انا اعرف كويس اوي ازاي اتعامل مع اشكال زيكم واخد حقي منكم 

قالها رائد وهو منفعل وخرج بسرعا وقلبه بيغلي من الغضب 

حاول يتحكم ف اعصابه وف غضبه وحزنه على ابوه ومحبش يبين ضعفه دا قدامها علشان كدا خرج بسرعا قبل ما يظهر حزنه على ابوه وركب عربيته ومشي. 

اما سليمان بعد ما خلص شغله 

قرر يروح المخزن يشوف الاء ويأدبها شوية ع اللي عملته 

الأعمال الأصلية لرواية وحكاية

فتح ومن غير ما يفتح النور فضل يقرب 

مريم برعب 

لا لا بالله عليك متقربش انت عايز مني ايه بقا حرام عليك مشيني من هنا والله انا مليش دعوة انا مش زيه مش زيه ومليش دعوة بعمايله والله العظيم 

سليمان استغرب من الصوت ومن الكلام اللي بتقوله 

ففتح النور 

مريم اترعبت وقامت بسرعا تستخبى ورا الكرتونة 

سليمان زعق 

اطلعي واقفي هنا قدامي اخلصي 

مريم برعب 

لا بالله عليك مشيني من هنا . خاف من عقاب ربنا .. والله انا مليش ذنب عايز تنتقم من بابا روحله انا مليش دعوة باللي بيعمله ومش زيه والله العظيم ارجوك سيبني امشي 

سليمان باستغراب من كلامها مد ايده ناحية ايديها وشدها خرجها من ورا الصندوق 

مريم صرخت اول ما لمسها

لكن سليمان اول ما اكتشف انها مش مريم سابها بسرعا 

ايه دا انتي مين وبتعملي ايه هنا؟؟؟ انطقي... ايه دا لحظة انتي؟؟ انتي اللي اختك بتشتغل ف شركتي وباب الحمام قفل عليها؟؟ 

مريم برعب 

اا انت صاحب الشركة؟؟ اا انت تعرف اللي اسمه رائد انت تبعه؟؟ 

سليمان 

لا لحظة بقا كدا علشان افهم.. انتي تعرفي رائد منين وهل هو اللي جابك هنا؟؟ 

مريم 

قصدك خطفني وانت الظاهر شرريك معاه دي عصابة مافيا بقا 

سليمان 

لالا استنى مافيا ايه وعصابة ايه فهميني ايه حكاية رائد وخاطفك دي 

مريم بحمقة 

اومال تسمي ايه اللي اسمه رائد مطاردني بقاله اكتر من سنة ومخليني مش بعرف اخطي من باب الشقة خوف منه عايشة حياتي كلها رعب وخوف بسببه ودلوقتي خطفني وحابسني هنا وكل دا لذنب انا معملتوش 

سليمان 

اا انتي بنت سامح اللي نصب وسرق عم حسين والد رائد 

مريم اخدت نفس عميق 

الظاهر انك تعرف الحكاية مش عارفة انت صاحبه ولا شريكه.. . ايوا بالظبط كدا انا بنت سامح الراجلاللي موت بابا رائد بحسرته .. بس انا ذنبي ايه ف غلطة ابويا ربنا قال ف كتابه ولا تزر وازرة وزر أخرى .. ليه بتحملوني ذنب مش ذبي .. انا معملتش حاجة ومعرفش حاجة عن شغل بابا والله العظيم

سليمان بشفقة علشانها 

جايز انتي معملتيش فعلا زي ما بتقولي بس .. رائد موجوع شاف ابوه بيموت بحسرته قدامه وابوكي واقف يضحك ولا يهمه.. رائد عايز ينتقم يرجع فلوس ابوه 

مريم 

مش بيا والله العظيم انا مش وسيلة للانتقام انا مقدرة حزنه ع ابوه وزعله من اللي عمله سامح بس انا مش هقدم ليه حاجة لة كان خاطفني علشان يبتز بابا فدي خطة فاشلة ومش هتنفع انا ابعد ما يكون عن تفكير بابا .. انا بابا مش بيحبني اصلا .. دا لدرجة انه قال رائد عايز يأخدك ولو طلبك مني هقوله خدها وخدها قصادها مروحة متخيل لدرجة ايه انا مش مهمة عنده؟؟

اتصدم سليمان من كلامها فقال 

للدرجة دي وايه اللي وصل علاقتك بأبوكي لكدا 

مريم 

ما انا لسه قايلة لك اني مش شبهه ومش موافقة ع اللي بيعمله.. انا وماما مش عاجبنا شغله وماما ياما اتكلمت معاه وانا كمان.. علشان كدا مش بيحبنا يتمنى يخلص مني زي ما خلص من ماما وقالهالي ف وشي اتمنى تموني زي ما امك ماتت .. ومش هقولك كمان ان بابا السبب ف موت ماما.. ياريته موتني انا كمان ومشوفش اليوم ولا الموقف اللي انا فيه دا .. ارجوكم بالله عليكم مشوني من هنا ومتأذونيش انا مليش اي حد والله العظيم وفلوس بابا لو هتاخدوها كلها انا مش عايزاها ومتهمنيش ف حاجة انا اعيش ع العيش الحاف ولا اكل من مال حرام 

سليمان علشانه كان عارفها قبل كدا وعارف انها انسانة رقيقة ومش مصطنعة وأنه شايف ان كل كلمة بتقولها صادقة بتطلع من القلب . علشان كدا صدق كلامها واتاكد انها مشزي ابوها وملهاش ذنب 

علشان كدا قال 

امم انا لو قولت كلامك دا لرائد دلوقتي مش هيقتنع لانه اهو يادوب متحمس أنه لقاكي اخيرا .. مش هيرضي يضيع خطط سنة كاملة ف الفاضي.. علشان كدا لازم نستنى فترة لما الأمور تهدى وخلال الفترة دي انتي لازم تمشي من هنا لانه مش مضمون ومش عارف هو ممكن ينتقم منك ازاي رائد حاليا الانتقام عاميه 

مريم خافت فسليمان هداها 

متخافيش انا مش بقول كدا علشان اخوفك على فكرة رائد اطيب انسان في الدنيا واوفا صاحب بس احيانا الشيطان بيعمي الإنسان عن الصح وقت الغضب اعذريه ابوه مات بحسرته قدام عينه وهو مكتوف الايدين معرفش يساعده ابوه كان كل حياته كان صاحبه وابوه وكل حاجة.. مش سهل عليه يخسره بالطريقة دي 

مريم عيطت 

وانا مكانش سهل عليا ابدا اشوف عمي بتموت قدام عيني وانا عارفة قاتلها كويس ومع ذلك مش قادرة اتكلم .. بس كان لازم اتحمل واديني بدفع التمن مرتين حمل صعب اوي عليا 

سليمان برق 

قصدك ان سامح ابوكي هو السبب ف موت امك ؟؟ هو اللي قتلها؟؟

مريم اتنهدت واخدت نفس عميق 

بابا وماما طول عمرهم مش على وفاق ومشاكل كتير من يوم ما فتحت عيني على الدنيا ودا لأن ماما مش راضية ع شغل بابا ومش عايزة تاكل من مال حرام . علشان كدا اول ما اتخانقوا وقعها ولما وقعت شوفت في عينه نظرة مش قادرة انساها ليه ولا قادرة اسامحه عليها لحد دلوقتي وف نفس الوقت مش قادرة اتكلم ولا الومه مهما كان ومهما عمل هو ابويا.. احساس صعب لما تحبس الالم جواك ومش قادر تطلعه ولا حد حاسس بيك 

قالتها مريم وانخرطت ف البكا 

سليمان حاول يهديها 

اهدي بس لو سمحتي ومتعيطيش كل حاجة هتتحل ان شاء الله ربنا يرحم والدتك ويرحم موتانا جميعا.. عارف ومتأكد ان ملكيش ذنب وانك عانيتي كتير بسبب بباكي وجه رائد زود عليكي.. الحل دلوقتي اني لازم اخدك من هنا ابعدك لحد ما الامور تهدى وانا خلال الفترة دي هحكي لرائد كل الحقيقة وهفهمه انك ملكيش دخل ويتصرف مع سامح نفسه انتي لا.. اتفضلي تعالي معايا قبل ما يرجع لانه ملوش مواعيد. 

مريم 

اتفضل معاك اجي فين انت كمان ارجوكم بقا سيبوني ف حالي 

سليمان 

والله مش هأذيكي اقسملك بالله انا هبعتك لأهلي الصعيد تعيشي معاهم 

بصتله بشك وخيبة امل فقال 

طيب انتي عايزة تقعدي فين دلوقتي وانا اوديكي المكان اللي تختاريه طالما مش واثقة فيا على فكرة انا صعيدي وكلمتنا واحدة يعني لو قولتلك هوديكي عند اهلي يبقة مبكدبش 

مريم 

لالا اهلك ايه واقعد هناك ع اساس ايه انا ممكن ءاجر اي مكان اقعد فيه لحد ما تقول لصاحبك الحقيقة .. حقيقي انا محتاجى احس بالامان واخرج وقت ما احب من غير خوف. 

سليمان 

تمام اوي تعالي هوديكي فندق تقعدي فيه لحد ما الاقي مكان موثوق تقعدي فيه براحتك. 

وبالفعل اخدها سليمان لفندق وبالصدفة طلع نفس الفندق اللي فيه الاء.. لكن من غير ما حد فيهم يعرف عن التاني حاجة. 

وسابها سليمان ورجع وهو ف العربية 

لحظة مريم نسيتني وجود الاء ف المخزن!! 

دلوقت انا حطيت الاء ف المخزن ودلوقتي لما فتحت ملقتش غير مريم معنى كدا ان رائد شافها وطلعها وحط مريم مكانها.. الاجابات كلها عند رائد ولازم افهم منه وداها فين .

ولما رجع ع الشقة لقا رائد ف انتظاره ومسكه من هدومه وقال بحدة 

سليمان انت وديتها فين انطق بقولك وديتها فين ... ما هو انا مش هفضل سنة بحالها بطاردها ومش عارف اعتر عليها ف اي مكان ومكلف رجالة ف كل شبر ف مصر ولما الاقيها واجيبها الاقيك تهربها 

سليمان بكل هدوء نزل ايد رائد 

اهدى يا رائد وفهمني انت بتتكلم عن ايه 

رائد 

سليمان متعملش فيها مش فاهم انا عارف انك فاهم كويس انا بتكلم عن مين... انطق قولي ليه خرجتها اوعى تقولي انك مشيتها اقسم بالله يبقى اخر يوم بينا 

سليمان 

بتبيع صاحبك يا رائد علشان انتقام سخيف.. انا هقدر حالتك اللي انت فيها وهقدر انفعالك وان وقت الغضب الانسان بيقول حاجاات هو مش مدركها وكمان ممكن يندم عليها بعدين علشان كدا مش هزعل 

رائد بغضب 

مش انتقام سخيف يا سليمان ومسمحلكش انت اكتر واحد عارف اللي فيها عارف حسرتي ع ابويا واني من غيره ولا حاجة ضايع مليش لي لازمة ولا اهمية.. ابويا لو كان مات موتة طبيعية كنت هكون راضي وهحاول اعيش وارضى بقضاء ربنا لكن ابويا مات مقتول وابوها اللي قتله بدم بارد وجاي دلوقتي تقولي انتقام سخيف انت قد الكلام اللي بتقوله 

سليمان 

وهي ذنبها ايه.. ليه بتاخدها بذنب ابوها.. هي مالها .. اتصرف انت ويا سامح مالك ومالها دي بنت ضعيفة لا حول ليها ولا قوة 

رائد هنا فضل يصقف 

لالا برافو بجد البنت دي مشكلة بجد دي حكاية... قدرت ف خمس دقايق بس تغير رايك بعد ما كنت مأيدني ف اللي بعمله بقيت بتدافع عنها وياعيني مصلح اجتماعي دا انت كمان الظاهر انك اتطوعت وعينت نفسك محامي ليها

سليمان 

رائد من فضلك بطل تريقة انا بتكلم جد حسابك مش مع البنت دي.. حسابك مع ابوها ودا اخر كلام عندي 

رائد ازداد غضب وصوته علي 

سليمان ااا متهزرش ف المواضيع دي والا لا تبقى صاحبي ولا اعرفك فاهم 

سليمان اخد نفس عميق لانه عارف ان صاحبه ف اشد حالاته غضب فحاول يهدي الدنيا 

طيب خلاص يا رائد متقلقش.. البنت اللي، انت بتدور عليها انا اعرف مكانها وانت لما تهدى كدا انا هقولك هي فين متخافش انا مخليتهاش تمشي.. انا بس خوفت انك تتهور وتعمل حاجة غلط فيها ف وقت غضبك الاعمى دا فبعدتها مؤقتا ممكن تهدى وترد ع سؤالي؟؟ 

رائد بانزعاج 

سؤال ايه انا مش عايز اسمع صوتك دلوقتي مش عايز اشوفك قدامي غور من وشي 

سليمان ضحك 

دا بيتي ع فكرة هتطردني من بيتي ياض... خلينا نتكلم جد يا رائد انا كنت حاطط بنت ف المخزن .. وديتها فين وانت بتحط مريم؟؟ ليه خرجتها من غير ما تقولي ليه خليتها تمشي 

رائد بعدم فهم 

بنت ايه انت كمان وهو دا وقت هزار 

سليمان زعق 

رائد مش وقته غباء ها... العروسة اياها اللي هربت يوم فرحي انا جبتها وحبستها قبلك هنا ف المخزن ودلوقتي لما جيت ملقتش غير مريم .. هي فين راحت فين معنى كدا وانت بتحط مريم خرجتها انطق اتكلم وديتها فين ولا سبتها تمشي ليه 

الأعمال الأصلية لرواية وحكاية

رائد 

انا مشوفتش اي حد ف المخزن لما كنت بفتحه المخزن فاضي وسبت مريم فيه ورجالتي قفلوا عليها ومشينا ولسه راجع حالا 

سليمان استغرب 

انت عايز تفهمني انك مشوفتهاش ايه كانت هوا؟؟ فص ملح و داب ازاي يعني فتحت ملقتش حد وخرجت ازاي دي 

رائد 

معرفش بقولك انا مشوفتش حد ومعرفش انك حاطط واحدة ف المخزن انت مقولتليش ولا جبت سيرة بالموضوع 

سليمان 

يعني انت اللي قولت بخصوص البنت اللي عايز تنتقم منها؟؟ القصد.... البنت دي هتكون راحت فين وخرجت ازاي يخربيتها دي متخصصة هروب خرجت من اوضتها ف بيت العيلة اللي كل اهل البلد فيه من غير ما حد شافها اكيد سهل عليهل تهرب من المخزن بكل سهولة.. بس هتروح مني فين مسيري الاقيها.. بس وقسما بالله المرة دي لو لقيتها لأخلص عليها واغسل عارها بإيدي ومحدش هيمنعني عنها البنت الي ملهاش ظابط ولا رابط دي امثالها ميستاهلوش الا الشدة اللين مينفعش معاهم خالص انا هريح ابوها منها 

قالها وفضل يكسر ف الفازات واحدة ورا التانية 

رائد لما شافه ف الحالة دي مقدرش يتكلم او يسأله تاني عن مريم ولا عن مكانها وقرر يسيبه يهدى.

تاني يوم 

مريم كانت ف اوضتها رايحة جاية ماسكة الفون ف ايديها وبترن على الاء

يوووه يا الاء ردي بقا انتي قلقتيني عليكي بقا يا ترى انتي فين دلوقتي وبتعملي ايه يا ترى اهلك مسكوكي ولا جالك ايه انتي اخر مرة قولتي مش عايزة تروحي الشركة بنت عمك شافتك واكيد وشت بيكي ودلوقتي ملكيش اي اثر.. 

سكتت شوية وفجأة برقت

لا مش معقولة معقولة انتي ف الصعيد؟؟ يعني اهلك اخدوكي على هناك؟؟ ياربي اكيد اذوكي جامد لا انا مش هينفع اسكت انا لازم اروح على هناك انا لازم اجيلك الصعيد انا ضاقت بيا الطرق ومعرفش اروح فين دلوقتي يبقة مفيش حل غير اني اجيلك الصعيد .. اه افتكرت المدير بتاع الاء كان عرض عليا ياخدني يخبيني من اللي اسمه رائد عند اهله ف الصعيد .. فرصة اروح هناك انا كمان وادور عليكي لازم انقذك يا الاء انا مبقاش ليا حد في الدنيا دي احبه و يحبني بصدق غيرك.. انا لما اشوف مستر سليمان لازم اطلب منه يوديني الصعيد باسرع وقت هجيلك يا الاء وهدور عليكي لازم اوصلك.

اما عند رائد فقرر يجي لآء الفندق يطمن عليها

ولما اتصل بيها وهي ردت 

صباح الخير يا الاء صاحية ولا صحيتك من النوم 

الاء 

وهو انا في وضع دا يهجيلي نوم ازاي بس 

رائد 

طيب ممكن اقعد اتكلم معاكي شوية 

الاء 

تمام هنزل لحضرتك تحت ف الريسبشن 

وبالفعل نزلت الاء وهي متعرفش ان سليمان جايب مريم هنا وممكن يجي ف اي لحظة.

رائد ابتسامة 

عريضة 

صباح الخير يا الاء اتمنى تكوني بخير 

الاء 

شكرا احضرتك يا استاذ رائد بجد مش عارفة اقول لحضرتك ايه.. اظبط بس اموري وهمشي ومش هعمل ازعاج ليك تاني 

راىد 

الاء انا عايزة اساعدك ممكن تفتحي لي قلبك و تقوليلي مين مخوفك؟ انا مستعد اساعدك واخدك القسم كمان نعمل محضر 

الاء 

دي حكاية ملهاش حل صدقني .. كل اللي اقدر اقوله ليك اني اتجوزت واحد ولما اتجوزته اكتشفت انه انسان مش كويس متجوز قبل كدا وعايز يذلني ويخليني خدامة لمراته الاولى .. متحملتش اعيش الحياة دي واكون تحت رحمة واحد معندوش ذرة رحمة اصلا علشان كدا هربت منه وهو بيدور عليا علشان يذلني اكتر واكتر 

رائد 

اتصدم لما عرف انها كانت متجوزة وارتبك لانه كان مفكرها انسة وكان بيفكر انه يطلبها للجواز 

فسكت ومبقاش عارف يرد للحظات 

ف الوقت دا 

سليمان كان جاي لمريم يطمن عليها 

الاء بصت قدامها وووو