الجزء التالت من قصة التبديل  

وبعد مرور خمس سنين ع الاحداث

كانت اسمهان اصبحت فيهم ست عجوزة وكبيرة فمبفتش تشتغل وراحت قعدت ع بنتها واصبحت امل وحيدة ف البيت ابوها احيانا بيجي كل اسبوع يشوفها واحيانا مش بيفتكرها اصلا الا لما تتصل بيه تطلب منه فلوس 

ف يوم امل كانت راجعة من الجامعة 

فوقفها شاب باين عليه انه صايع وملاوع 

ايه يا جميل ماشي لوحدك ليه بس ما تيجي معايا دا انا هبسطك اوي.. بدل ما انت قاعد لوحدك يا جميل.. ولا ايه رايك اجيلك انا البيت ما انتي علطول قاعدة لوحدك ومفيش حد معاكي ولا حد بيدخل ولا بيخرج انا مراقبك من فترة يعني محدش هيقولك انتي بتعملي ايه..ها يا حلوة ايه رايك وهعطيكي اللي انتي عايزاه كمان اطلبي من الف لعشرة انا رقبتي ليكي ها قولي موافقة دا انا متعشم من بدري 

امل خافت منه وحاولت تسرع ف خطاها 

لحق بيها 

اقفي عندك بس رايحة فين ما هو انتي ياما توافقي بمزاجك يا اما غصب عنك مفيش عندك اختيارات هو حل من الاتنين يا حلوة... لو موافقتين برضاكي هتلاقيني طابب عندك ف الشقة وانتي نايمة وهاخد اللي انا عايزه فأحسنلك يكون برضاكي علشان نتبسط كلنا يا جميل 

امل عيطت 

انت عايز مني ايه انا مش كدا ابعد عني ارجوك سيبني ف حالي روح للبنات اللي شبهك 

الشاب 

جربتهم كلهم وزهقت من الصنف ومحتاج اغير يا جميل وبصراحة بقا النوع بتاعك دا انا مجربتوش انا حاسس انك لسه لوزة بقشرتها وعايز اجربها يا لوز اللوز انتي 

امل سابته وجريت بسرعا على الشقة 

الشاب 

اجري اجري يا حلوة مهما تهربي مسيرك ف يوم هتقعي تحت ايدي ووقتها محدش هيرحمك مني وهعمل اللي انا عايزه 

امل دخلت الشقة وقفلت الباب وراها بالمفتاح والاقفال وجريت بسرعة ع الشبابيك وفضلت تقفل فيها وراحت ع البلكونات وفضلت تقفل فيها كويس وتتاكد ان كل حاجة مقفولة ومحدش يقدر يدخلها 

لكنها كانت لسه خايفة فقعدت ع الارض ضامة رجليها بإيدها وبتعيط 

وبعد شوية اتصلت بأبوها 

كريم رد بانزعاج لانه كان مشغول بنزواته ايوا زي ما سمعتوا كدا من وقت ما هبة ماتت وشاف حجود بنته وهو اتغير اخلاقه باظت اكتر وبقا كل يوم يعرف واحدة شكل وكل دا ولينا متعرفش حاجة 

كريم 

ايوا يا امل ف ايه مش كل شوية تتصلي بيا عايزة فلوس .. انا مش Atm يا امل اعملك ايه يعني ارحميني 

امل ببكا 

المرة دي مش عايزة فلوس يا بابا رغم اني مش بطلب كتير يادوب بطلب مصاريفي لانك بتنساني وبتنسى تبعت علشان كدا بتصل اطلب لان معنديش دخل اعمل ايه.. حضرتك ناسيني خالص ومش بتيجي غير بسيط اوي.. من يوم ما ماما ماتت وانت مأهملني خالص.. هو انت مكنتش بتيجي غير علشان ماما طب وانا.. مش انا بنتك بردو ولا كنت بتكدب عليا وقتها هل انا لقيطة انا بنت من الشارع وانت بتعطف عليا مش كدا 

كريم هنا اتعدل ف قعدته 

يووه يا امل مفيش فايدة كل مرة الكلام الماسخ دا خرجتيني من المود يا بنتي.. انتي بنتي بنتي احلفلك ع المصحف علشان تصدقي ولا اعمل ايه يعني مبقتش عارف.. انتي عارفة اني مش فاضي مشغول مشغول علشان اجيبلك فلوس تصرفي منها 

امل ببكا 

يعني لما ماما كانت عايشة كنت بتلاقي وقت تيجي تشتوفني وتقعد معايا ودلوقتي لا.. هي الفلوس احسن مني ؟؟ .. خلاص متبقاش تزعل لما تلاقيهم اعتدوا عليا علشان انا لوحدي واللي مجرأهم انهم عارفين ومتأكدين اني عايشة لوحدي ومفيش حد بيسأل فيا 

كريم باستغراب 

هما مين دول اللي اتجرئوا عليكي حد اتعرضلك يا امل انطقي؟؟

امل 

هيتعرضوا يا بابا دا قالها صريحة قالي تيجي بالذوق ولا بالعافية ولو مش بمزاجك هتلاقيني باليل عندك ف قلب شقتك ما انتي لوحدك ومحدش بيسأل عنك... انا خايفة يا بابا خايفة انام ... البيت مبقاش امان خايفة الاقيه قدامي.. متأكدة انه يقدر يعملها دا انسان قذر مش بيخاف من حاجة ارجوك الحقني يا بابا لو بتحبني تعالى اقعد معايا بالليل ع الاقل 

كريم كان خلاص مزاجه اتعكر ومش عارف يفكر فقال 

خلاص اهدي وبطلي عياط دلوقتي وانا هشوف هعمل ايه وهقولك 

امل 

انت لسه هتفكر يا بابا انت لازم تيجي تبات معايا النهاردة لو خايف عليا خايفة يأذيني بالله عليك متسبنيش 

كريم 

امل متكبريش الموضوع انتي مش مقفلة الشقة والأبواب والشبابيك عليكي كويس؟؟ يبقة خلاص هيدخل منين يعني ولا هيعمل عفريت ويدخل والباب مقفول سلام دلوقتي هكلمك بعدين 

امل كانت هتتجنن من اللا مبالاة بتاعة ابوها فقامت بسرعة خدت التلفون واتصلت بصاحبتها ف نفس العمارة 

ياسمين ياسمين ممكن بالله عليكي تسنأذني مامتك وتيجي تنامي معايا النهاردة بس بالله عليكي خايفة ومش عارفة انام ولا اقعد لوحدي 

ياسمين 

فيه ايه يا امل ما انتي طول عمرك بتقعدي لوحدك ومش بتخافي ايه اللي جد ليه خايفة 

امل مش عارفة مش عارفة ارجوكي يا ياسمين تعالي اقعدي معايا وبكرة الصبح امشي بالله عليكي 

ياسمين 

طيب طيب خلاص والله هتحايل ع ماما وهجيلك ابات معاكي بس انتي متأكدة ان باباكي مش جاي الليلة؟؟ 

امل ببكا

مش جاي لسه قافلة معاه وقالي مش فاضي انا محتاجاكي يا ياسمين انا تعبانة اوي ومش عارفة اعمل ايه حاسة اني منبوذة حاسة اني لوحدي مليش حد حتى بابا اللي باقيلي ف الدنيا دي مش لاقياه مش فاضيلي ابدا .. امتا اموت وارتاح 

ياسمين 

متقوليش كدا يا امل بالله عليكي واستعيذي بالله من الشيطان الرجيم يا حبيبتي يلا افتحي الباب انا نازلالك حالا.

....

تاني يوم كريم كان في الفيلا بيفطر فسمع لينا بتقول لواحدة من الشغالات 

طيب دلوقتي سماح هتاخد اجازة وضع ياريت تشوفي حد امين ونضيف تعرفيه علشان يحل مكانها الفترة دي بس اهم حاجة تكوني واثقة فيها مش هدخل هنا اي حد وخاصة للأكل! 

هنا كريم اتدخل ونادى ع لينا 

لينا من فضلك ممكن تيجي شوية عايزك 

لينا راحت قعدت ع الكرسي جنيه 

نعم يا كريم خير فيه حاجة يا حبيبي ة؟

كريم اتنهد بعد ما خد قراره خلاص وقال 

انا اعرف بنت غلبانة كانت طالبة مني شغل فوعدتها اني هشوفلها وهحاول اوفر ليها فرصة شغل فإيه رايك تشغليها مكان سماح ؟؟ 

لينا ابتسمت وقالت 

حبيبي يا كريم طول عمرك سباق بالخير وبتحب تساعد الناس حاضر تمام ممكن تقولها تيجي النهاردة او بكرة اشوفها وانا هحاول اشوفلها اي شغل هنا ان شاء الله 

في الوقت دا نزلت نورا وف ايديها شنطة السفر بتاعتها 

اشوف وشكم ع خير يا جماعة

لينا 

رايحة ع فين يا نورا خير اخدة شنطتك ليه 

نورا 

رايحة اعمل كامبينج مع اصحابي يا مامي هنفضل هناك اسبوع يلا سلام 

لينا قامت عندها وحضنتها وهي بتقول بعتاب خفيف 

كدا متقوليليش قبلها .. معرفش غير وقتها يا نور !! 

نورا بدون اهتمام 

سوري مامي اتلهيت ف ترتيب شنطتي ما انتي عارفة مبحبش حد من الشغالات يعملي حاجتي بقرف منهم.. يلا سلام دادي

كريم من غير ما يبصلها لانه مبقاش يحبها 

سلام نورا 

... 

بعد كدا كريم راح لأمل 

امل كانت في مزاج مش احسن حاجة بسبب خوفها ومنزلتش جامعتها 

لكنها اول ما شافت ابوها فرحت 

بابا اخيرا جيت انا مش مصدقة نفسي هتقعد معايا هنا علطول مش كدا 

كريم 

امل روحي لمي هدومك وحاجتك ف شنطة وتعالى يلا 

امل 

خير يا بابا احنا هنروح فين!! احنا هنسيب المنطقة هنا 

كريم 

ايوا هاخدك تعيشي معايا في بيتي  

امل باستغراب 

انت عندك بيت تاني غير دا يا بابا!! اه دا يفسر انك مبقتش تيجي هنا 

كريم 

هفهمك كل حاجة ف العربية يلا 

ولما لمت حاجتها وركبت العربية مع ابوها كريم قال 

امل انتي لازم تعرفي اني متجوز 

امل بصدمة 

ايه!! بجد انا اول مرة اعرف الموضوع دا يا بابا حضرتك فاجىتني؟؟ وهل دلوقتي رايحين بيت مراتك الجديدة؟؟ 

كريم 

ايوا يا أمل.. ومراتي الجديدة دي عندها بنت في سنك كدا بالظبط.. بس اسمعي انا مقولتلهش اني كنت متجوز قبل كدا يعني لما تروحي هناك متجبيش سيرة ابدا اني ابوكي مفهوم؟؟ 

امل بحزن 

ايه؟؟ اومال هعيش هناك بصفتي ايه يا بابا لو مش عايزني اقولهم انك والدي هعيش متطفلة عند ناس فاكرني غريبة عنهم؟؟ 

كريم 

دا حل مؤقت بس يا أمل لحد ما اشوف حل مناسب انا شايف ان الحل دا انسب حل دلوقتي انا هقدمك هناك ع انك الطباخة الجديدة ومتقلقيش لينا مراتي طيبة جدا 

امل بدموع 

عايز تشغلني خدامة ف بيت مراتك الجديدة يا بابا؟؟ يعني من وقت ما ماما ماتت وانت متجوز ومش معبرني ويوم ما تفكر تعبرني تشغلني خدامة لمراتك الجديدة... لا انا اسفة يا بابا مش هينفع انا عايزة ارجع شقتي .. خوفي فيها لوحدي افضل من اللي هيحصلي دلوقتي 

كريم 

بطلي هبل بقا وكلام دراما.. انتي هتعيشي افضل عيشة هناك.. لينا مراتي غنية اوي يعني هتعيشي عيشة عمرك ما كنتي تحلمي بيها ابدا 

امل 

ايوا ما هو واضح فعلا خدامة يا بابا... بابا انا طالبة جامعية حضرتك تقدر تقولي ايه اللي يجبرني اني اهين نفسي بالشكل دا ... لو حضرتك زهقت مني ومبقتش عايز تجيلي او حتى تصرف عليا قولي وانا هحاول اتصرف هحاول اصرف ع نفسي بس مش بالطريقة دي مش هشتغل عند مرات ابويا خدامة ابدا .

هنا كريم مد ايده وضربها بالقلم ع وشها وهو بيزعق 

الظاهر اني دلعتك زيادة علشان تتفرعني عليا . انا عمال بالي مشغول بيكي علشان اوفر ليكي حماية ومكان كويس تقعدي فيه وانتي مصرة تروحي للشر برجليكي ايه عايزة تنحرفي وتروحي للتهديد بنفسك لا فوقي انا مش هسمحلك بدا ومنصبي ومكانتي دلوقتي مبقاش يسمح اني اجي المكان دا تاني يعني انتي هتعيشي معايا عند مراتي الجديدة وتعملي اللي قولتله عليه ورجلك فوق رقبتك فاهمة ؟! 

امل بصتله بزهول وصدمة وخوف ف نفس الوقت لاول مرة يمد ايده عليها ويضربها في حياته 

علشان كدا حست بالكسرة فنزلت وشها ونزلت دموعها بصمت

كريم زعق 

امل فهمتي انا قولت ايه اياكي حد يعرف انك بنتي انتي فاهمة ولا افهمك بطريقتي 

امل هزت راسها لفوق ولتحت من غير ما تبص لأبوها وفضلت دموعها نازلة على خدها 

كريم نفخ بضيق وساق العربية ولما خلاص وصل للفيلا قال وهو بيعطيها منديل 

امسحي وشك وبطلي دموعك دي يلا علشان وصلنا مش عايز حد يشك ف حاجة اخلصي.

وبالفعل دخلت امل مع ابوها لبيتها الاصلي اللي حرمها منه من حنان أمها الحقيقة 

بس دخلته بقلب مكسور بنفس حزينة بجسد بلا روح... كلام ابوها خلاها فقدت الثقة ف اي حد وحست انها وحيدة في الدنيا .

رحبت بيها لينا اول ما شافتها وخاصة بعد ما لاحظت الانكسار والحزن اللي هي فيه 

كريم 

لينا اهي البنت اللي قولتلك عليها ياريت تشوفيلها مكان مناسب تقعد فيه لان مبقاش ليها مكان صاحب البيت طردها وكانت هتقعك ف الشارع 

لينا بشفقة 

يا حبيبتي شكلها صغير اوي يا كريم... متقلقيش يا قمر انتي هتفضلي معانا هنا وان شاء الله يعجبك المكان والمعاملة كمان بس اهم حاجة الامانة طيب؟؟ المهم قوليلي اسمك ايه انا مدام لينا 

أمل بصت لأبوها بحزن ورجعت بصت للينا 

اهلا بيكي يا مدام لينا .. انا اسمي أمل واتمنى تقبليني خدامة عندك هنا.. لاني مبقاش ليا أهل يسألوا فيا ولا بقت ليا حد 

كريم زفر بضيق وسابهم وطلع ع اوضته يدخن سيجارة 

اما تحت لينا رتبت على كتفها 

ليه يا امل اهلك فين يا حبيبتي ممكن تحكيلي عنك اكتر 

امل 

مفيش اي حكاية يا مدام لينا كل الحكاية من اول ما ماما ماتت وبابا مبقاش سائل فيا وانا عايشة لوحدي فمضطرة اصرف ع نفسي علشان اعيش ولو اني بتمنى اني احصلها قريب واخلص من اللي انا فيه 

لينا اخدتها ف حضنها 

متقوليش كدا ابدا يا حبيبتي ربنا كبير وقادر يغير الأحوال للاحسن ان شاء الله 

امل برقت واتفاجئت بالحضن دا .. لاول مرة من سنين طويلة حد يحضنها 

كانت محتاجة للحضن الدافي دا اوي فغصب عنها شددت من احتضانها وفضلت تعيط 

لينا كمان علشان قلبها طيب رقت لأمل وكانت هتعيط هي كمان 

بس يا امل مش هينفع كدا... كدا انا هعيط انا كمان يرضيكي كدا ؟؟ 

امل خرجت من حضنها بحرج رغم أنها مكانتش عايزة تشبع منه ابدا 

اا انا اسفة والله مش قصدي حقك عليا انااا 

لينا بابتسامة هادية 

ولا يهمك يا روحي مفيش اي مشكلة بس اوعديني اني مش اشوف دموعك دي تاني واعتبريني يا ستي زي ما ماما واوعدك انك هتكوني مبسوطة هنا بس اهم شىء عندي الأمانة يا امل وانا اعطيكي عيوني 

امل بصتلها بحب وامتنان لانها ادركت انها ست طيبة اوي وحنونه وحبيتها فقالت 

والله مش هخيب ظنك ابدا ابدا.. انا مش جاية هنا لحاجة وحشة والله العظيم ابدا 

لينا 

متأكدة من دا باين عليكي يا قمر انك بنت كويسة بس الزمن اللي جه عليكي معلش يلا روحي مع تسنيم هتوريكي اوضتك اللي هتقعدي فيها وهتكون خاصة بيكي انتي لوحدك.

وفعلا قعدت فيها امل ورتبت حاجتها بعدين خرجت تتعرف ع المطبخ اللي هتشتغل فيه وبدأت شغلها 

وهي بتقدم الغدا لأبوها وللينا 

حطت الأكل ع السفرة واتكت ع كلمة 

اتفضل الاكل يا كريم بيه... اتمنى يعجبك طبخي لأول مرة .. اا انا كنت عايزة اشكرك عل الفرصة دي وانك لقيتي شغل عندك اعيش منه مش عارفة اقول لحضرتك ايه 

كريم بصلها بزهق وقام من ع الأكل 

لينا انا افتكرت معاد مهم انا لازم الخق اروحه سلام 

لينا 

يا خبر يا كريم دلوقتي! وقت الغدا طيب اتغدى الاول ع السريع وبعدين روح المعاد 

كريم بص لأمل بزهق 

لا مش هلحق بعدين بعدين سلام يا روحي 

امل ف نفسها ضحكت بسخرية

ههه اهرب اهرب من عاملتك والله يا بابا لهخليك تندم ع عاملتك دي فيا وهفضل احسسك بالذنب... مراتك طيبة خالص ليه ليه تشغلني ف بيتك خدامة وانت لسه حي ترزق بدل ما تكون الدرع الواقي ليا!! 

فاقت امل من شرودها ع صوت لينا الحنون 

امل.. امل سرحانة ف ايه بقولك ايه اقعدي اتغدي معايا مبحبش اتغدى لوحدي ونورا بنتي مش هنا مسافرة 

امل بصت لها بحب 

حاضر يا مدام لينا هلبي طلبك اكيد شكرا لحضرتك 

وقالت ف نفسها 

بابا جوزها يعني البيت دا من حقي اقعد فيه براحتي واعمل اللي انا عايزاه مش هتصرف بحذر وهاخد راحتي زي ما انا عايزة محدش هيقدر يكسرني واللي هيفكر ف دا انا اللي هقلب الترابيزة عليه .. وطالما انا لوحدي فهكون الداعم الوحيد لنفسي.

وبعد مرور اسبوع كانت امل اتعودت فيه ع المكان وقررت تنزل جامعتها من تاني 

طنط لينا من فضلك ممكن تقوليلي مواعيد الغدا علشان اظبط نفسي عليها.. علشان اقدر احضر الأكل قبل ما اروح جامعتي عندي ميت تيرم ومش هينفع اغيب اكتر من كدا بقالي اسبوع كامل مروحتش 

لينا 

يا خبر يا امل مش تقولي يا بنتي ان عندك جامعة انا معرفش انك بتدرسي حقك عليا... لا طبعا روحي جامعتك وملكيش دعوة بالاكل ... انتي من هنا ورايح هتكوني مسؤلة من بعد الساعة ٥ وهجيب حد يكون مسؤل الفترة الصباحية ها كدا مناسب يا حبيبتي 

امل بامتنان 

مناسب جدا يا طنط شكرا جدا لحضرتك 

لينا 

طنط طالعة من بوءك زي العسل يا أمل 

امل 

اا انا اسفة اني بناديكي بطنط لو عليا نفسي اناديكي ماما انا حبيتك اوي 

لينا 

يا روحي وانا كمان والله حبيتك اوي ناديني براحتك زي ما تحبي انا معنديش اي مشكلة خالص. 

تاني يوم رجعت نورا من السفر بعد ما حصل معاها ابشع شىء ف الدنيا ضعفت وباعت نفسها وجسمها للشيطان ولما فاقت لنفسها زعلت ورجعت بسرعا ع البيت 

كان مزاجها مش احسن حاجة وعمالة تزعق وطاحت ف الكل 

ايييه يا بهايم ساعا علشان تفتحوا الباب ايه القرف دا... امسكي بسرعة طلعي شنطتي اتحركي ايه اللكاعة دي اومال جايبينكم تشتغلوا هنا ليه علشان تتدلعوا... وانتي بسرعة عايزا عصير فريش اخلصي انا تعبانة ومش طايقة نفسي 

امل كانت وقتها راجعة من الجامعة ولما شافتها 

قالت 

ايه البنت المقرفا دي معقول معقول البنت السمجة اللي معندهاش زوق ولا احساس دي بنت طنط لينا الرقيقة الكيوت مفيش وجه مقارنة ولا ترابط بينهم ابدا واصلا مش شبها دي شبه بابا اكتر 

امل ف نفسها 

لحظة ازاي شبه بابا كدا وهو قالي انها مش بنته بنت طنط لينا بس!! غريبة اوي معقول كدب عليا! بابا بعد اللي بيعمله معايا اتوقع منه اي حاجة بجد يا ترى الحقيقة فين بجد 

لينا جت 

ايه يا نور يا قلب ماما .. مالك كدا راجعة ومش طايقة نفسك وبتزعقي للكل ليه فيه ايه يا روحي حمدا لله على سلامتك 

نورا 

مامي انا زهقانة وتعبانة اوي وهما مش مريحين ابدا اخدوا ع الدلع شدي عليهم شوية يا مامي لاما مشيهم كن هنا وهاتي غيرهم 

لينا 

متقوليش كدا يا نور دول طيبين جدا وشايفين شغلهم كويس وكمان معانا من زمان يعني اتعودنا عليهم وهما اتعدوا علينا مش هينفع تقولي كدا يلا اطلعي ارتاحي يا حبيبتي علشان اعصابك تهدى 

هنا جت تسنيم 

اتفضلي العصير الفريش يا ست نورا 

نورا اخدته وشربته وناولتها الكوباية وهي بتقول 

اغسليها كويس وطلعيلي اكلي ع فوق حالا يلا والاكل اللي انا بحبه مفهوم؟؟ 

امل ف نفسها 

قليلة الزوق بصحيح 

لينا لأمل بعد ما بنتها طلعت اوضتها 

اهلا يا امل حمدا لله على السلامه معلش ممكن تدخلي تعملي الاكل وتطلعيه لنورا في اوضتها؟؟ 

امل بابتسامة هادية 

حاضر يا طنط هغير بس هدومي وهطلع ليها الأكل علطول 

لينا 

معلش لو نورا قالتلك كلمة تضايقك تجاهليها هي مزاجها وحش النهاردة او ف العادي يعني فمتحطيش ف اعتبارك ابدا 

امل 

تمام يا طنط ولا يهمك 

وطلعت امل بعد ما غيرت هدومها بصينية الأكل لنورا خبطت الباب بالراحة لكن نورا مسمعتهاش كانت مندمجة ف الفون اللي بتقول فيه 

انت لازم تتصرف يا فادي وتيجي تطلبني من بابي بعد اللي حصل ما بينا دا مش هينفع تأجل اكتر من كدا 

امل ف نفسها 

يخربيتك ايه اللي حصل ما بينكم يارب ما يكون اللي ف بالي صح 

وخبطت تاني علشان نورا تنتبه فقفلت الاتصال بسرعا وفتحت الباب 

انتي مين انا اول مرة اشوفك 

امل بابتسامة سمجة 

انا جايبة ليكي الأكل زي ما طلبتي

نورا برخامة 

اه انتي الطباخة الجديدة بدل سماح اممم شكلك مش بطال بس يارب تكوني تضيفة لاني بقرف اوي اغسلي ايدك علطول فاهمة!! 

امل 

انا انضف من ناس كتير باين ان شكلهم نضيف بس جواهم عفانة الدنيا كلها 

نورا بغضب 

انتي قصدك ايه.. انتي قليلة الادب والزوق كمان امشي اطلعي برا ومشوفش وشك هنا تاني انتي فاهمة!!

امل 

ايه يا هانم انتي اخدتي الكلام ع نفسك ليه هو انا قولت عنك حاجة انتي غريبة اوي 

نورا 

قولت امشي من هنا مشوفش وشك تاني اطلعي براااا 

امل 

مش بمزاجك تمشيني من هنا يا هانم علشان انا هنا بتوصية كريم بيه وهو بس اللي يقول امتا امشي وامتا افضل عن اذنك 

امل نزلت وسابتها ففضلت نورا تسب وتشتم بأبشع الالفاظ 

فأمل ف نفسها 

والله لأوريكي يا كلبة البحر انتي.. بنت قليلة الادب ومتدلعة ومشافتش بربع جنيه رباية 

ونزلت امل تحت وعملت انها زعلانة 

طنط لينا اشوف وشك على خير انا مش عارفة اروح فين ولا اعمل ايه بعد كدا والله انا كدا هبات ف الشارع خلاص وانا اللي قولت الدنيا هتنور ليا من تاني لكن تقريبا دا كان حلم جميل وخلص بسرعة 

لينا بخضة 

ليه فيه ايه يا امل مالك انتي بتقولي ليه كدا 

امل بادعاء المسكنة 

نورا بنت حضرتك اول ما شافتني فضلت تزعق انتي جاية هنا ليه يا مقرفة مش عايزاكي تعملي ليا الأكل انا بقرف منك امشي اطلعي برا مشوفش وشك هنا تاني 

لينا 

يا خبر .. انا عارفة ان طباع نورا بنتي حادة شوية وياما حاولت اغيرها بس معرفتش للاسف... حقك عليا متزعليش يا امل هي النهاردة راجعة متضايقة شوية بصي علشان تتفاديها انتي مش هتكوني المسؤلة عن طلوع الاكل ليها هبعت تسنيم لكن الكلام اللي قالته متهتميش بيه انتي هنا بأمر مني وانا مش هسمح انك تمشي ابدا.

يتبع

إلى حين نشر الفصل الجديد للكاتبة أسماءعبدالهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة‏