أحفاد إلياس - الفصل 36 | زينب سعيد القاضي

قراءة رواية (أحفاد إلياس) كاملة

تنشر حصريًا على مدونة رواية وحكاية قبل أي منصة أخرى




رواية: (أحفاد إلياس)

رواية جديدة قيد النشر

الكاتبة: ( زيب سعيد القاضي)|الفصل: (36)



هناك جراح صعب إلتئامها مثل جرح الكرامة فلا يداوى ولا يطيب، ويكون علاجه الوحيد الثأر لأنفسنا حتى لو كان هذا الثأر سيقوم بأذيتنا نحن قبلهم لكن المهم أننا نسترد كرامتنا ونداوي جراحنا.


فالكرامة هي الروح التي إن انكسرت، غدا الجسد هيكلاً بلا حياة، وتاه الإنسان في أرضه بحثاً عن ظله المفقود. 

لذلك، قد يبدو الانتقام في لحظة الألم كأنه الدواء الوحيد، وكأنه الشعلة التي تعيد الدفء لروح تجمّدت من قسوة الإهانة. لكنْ، ما أبهظها من فواتير! وما أثقلها من كؤوس، تلك التي نجرعها لأنفسنا أولاً قبل أن نسقيها لمن ظلمونا. 


فنحترق بنار الثأر التي أوقدناها بأيدينا، ونكتشف بعد فوات الأوان أننا داوينا الجرح بطعنة أخرى أنقذت غرورنا لكنها أزهقت بقية السلام في دواخلنا.


إلا أن الحكمة الدفينة في طيات هذا الألم تقول إن أعظم ثأر، وأبقى علاج، ليس في النزول إلى مديات الخصم ولا في إحراق الذات على مذبح الانتقام.. بل في التعالي.


فحين نختار ألا نمنحهم شرف تدميرنا مرتين، وحين ندير ظهورنا لكبرياء جريح ونمضي نبني ما تهدم فينا بصمت، نكون قد استرددنا كرامتنا بأطهر الطرق وأصعبها؛ لأن الكرامة الحقيقية لا تعود بالدمار، بل بالازدهار رغماً عن كل من حاولوا كسرنا.


نوران 💔 عمر.

❈-❈-❈

تململت في نومها وفتحت أهدابها بتثاقل ظلت تربش بعينيها عدة مرات حتى تستوعب أين هي حتى جاءتها ومضات الأمس فتذكرت حفل زفافها، مطت شفتيها بحيرة فهي قد غفت بعمق لم تتذوقه منذ وقت طويل، هل وجودها إلى قرب إلياس جعلها تطمئن وتغفى بسلام؟!، نظرت في الطرف الآخر وجدت زوجها غافيًا بثبات عميق، ظلت تنظر إليه بترقب شديد ودون شعور منها غامت عينيها بغشاوة من البكاء عندما تذكرت الرسالة التي وصلتها بالأمس، انتفضت من مكانها سريعًا وهي تحدق في زوجها بترقب خشية استيقاظه الآن، تحركت بخطى حذرة تبحث عن هاتفها وجدته يوضع على طاولة الزينة، حملته بيد مرتعشة وهي تدعي الله داخلها أن يكون كابوس لا أكثر لكن ما أن فتحت تطبيق المراسلات وفتحت شات المحادثة بينها وبين آزاد حتى بهت وجهها مرة أخرى فما رأته الأمس حقيقة بالفعل.


هزت رأسها بهزيان لا تصدق ما أمامها فهل هو حقيقة بالفعل أم أنه يلاعبها كعادته، لكن مؤكد لو كان يلاعبها فهو على يقين أن خدعته ستكشف، ولكن لو حقيقة بالفعل لما فعل فيها هذا؟! لما تركها تعاني وتعيش هذا الألم من الأساس هل خطته اللعينة كانت أهم منها ومن حياتها لديه؟!


ابتسمت ساخرة رغمًا عنها فلو حديثه صادق فمن المؤكد أن إلياس سيطلقها بالفعل ويطردها من حياته بالفعل، يجب أن تفكر جيدًا فيما عليه فعله، وعليها أن تعترف هي بنفسها بالحقيقة كاملة لإلياس فهو أكرمها ورفع من شأنها في الوقت الذي كان الجميع يبغضوها وينهشوا بها وبعرضها بقسوةً ودون وجه حق.


أغلقت الهاتف ونهضت من مكانها بتثاقل متوجهة إلى المرحاض فكل ما تريده الآن هو أخذ حمام بارد تنعش به جسدها وترفع عن كاهلها، ألقت نظرة سريعة على زوجها المستغرق في نومه وهمست بأسف:

– حقك عليّ سامحيني…


ولجت إلى المرحاض وأغلقت الباب خلفها، فتح عينيه بتثاقل شديد وهو يوفر بضيق ويمسح على جبهته:

– يا ترى مخبية عني إيه تاني يا وتين؟! إيه إللي قالب حالك في يوم وليلة؟! نفسي تثقي فيّ وتحكيلي مالك لكن طول ما إنتِ خايفة وبتحاولي تخبي عني كل حاجة هتوصلينا لنقطة النهاية قبل ما حتى نبدأ الحكاية.

❈-❈-❈


ظلت واقفة كما هي تتملل بإرهاق شديد؛ كل ما تريده الآن أن تركض إلى غرفتها وتغلق بابها عليها كي تشعر بالأمان والاستقرار لكن مجئ عمها قلب كل الموازين.


 كانت تستمع إليه دون أدنى اهتمام حتى استمعت إلى جملته الأخيرة التي جعلت وجهها يبهت من شدة الصدمة وهي تردد بعدم استيعاب:

– فرح؟! وعروسة؟! حضرتك بتقول إيه يا عمي أنا مش فاهمة حاجة؟!


ابتسم بتشفي وقال:

– فرحك إنتِ على وليد باشا.


حركت رأسها بعدم استيعاب:

– وليد باشا مين؟؟ حضرتك بتقول إيه؟!


زفر بنفاذ صبر وردد:

– من الآخر في عريس أتقدم ليكِ وأنا وافقت وعريس بسم الله ما شاء الله عليه باشا ابن باشا وحسب ونسب يعني جوازة لوز اللوز وهترفعك وهترفعنا من الفقر ده إحنا خلاص اتفاقنا على كل حاجة وفرحك كمان كام يوم.


ضربت سُمية على صدرها بصدمة، وهتفت مستنكرة:

– يخيبك راجل بتقول إيه يا راجل إنتَ اتجننت في عقلك ولا إيه؟! هتجوز البت من غير علم إلياس باشا؟! وكمان اتفقت على الفرح؟! ده إنتَ وقعتك سودة ومطينة بطين.


رمقها شذرًا وتمتم باستياء:

– ما تسلمي لسانك يا ولية إنتِ وبعدين هي بنت أخويا ولحمي ودمي ومحدش له كلمة عليها غيري وبعدين ده أنا هجوزها جوازة السعد.


مصمصت شفتيها بعد رضا بعد أن شملته بنظرة حارقة وهي تطالعه من أعلى إلى أسفل باحتقار:

– لحمك ودمك؟! ده من إمتى يا راجل يا ناقص؟! إنتَ فاكر كلامك الأهبل ده هيخيل عليٌ؟! اقطع دراعي من هنا لو ما كنت طالع بسبوبة من إمتى الحداية بتحدف كتاكيت.


تجاهل الرد عليها، وتوجه بنظراته تجاه ابنة شقيقة الشاردة كما لو كانت في عالم آخر:

– ما تردي يا عروسة رأيك إيه موافقة صح؟!


هزت رأسها نافية وأجابت:

– لا مش موافقة أنا مش هتجوزه ولا هو ولا غيره مش عايزة أتجوز.


جن جنونه وانتفض من مكانه، وهرع إليها جاذبًا إياها من ذراعها وهو يصيح بجنون:

– معنى كلامك ده إيه يا بنت أخويا؟! ردي ساكتة ليه؟! يبقى كلام الناس عنك صح ولا إيه؟!


تألمت من شدة قبضه، وهي تئن بألم:

– أه سيب إيدي هتتكسر في ايديك.


غمغم بقسوة:

– ده أنا هكسر رقابتك كمان مش دراعك بس وأغسل عاري كمان.


شحب وجهها، وتساءلت بصدمة:

– تغسل عارك؟! إنتَ بتقول إيه أنا مش فاهمة؟!


تدخلت سنية كي تنجدها من براثنه وهي تضمها إلى أحضانها بلهفة وترمقه بإزدراء:

– أبعد عنها يا راجل إنتَ بدل ما أصوت والرجالة تيجي تشيلك ترميك بره.


على الرغم من خوفه، وانتفاضة جسده إلا أنه حاول مدارة ذلك بجدارة وأكمل حديثه باستماتة:

– يرموني بره عشان بدافع عن شرفي؟! عايزيني أسيب عرضي للبيه بتاعكم ينهش فيه.


بهت وجه سمية وبصقت في وجهه باحتقار:

– إنتَ اتجننت يا راجل إنتَ؟! إيه الكلام الفارغ إللي بتقوله ده؟!


ابتسم بسخرية وردد:

– الكلام الفارغ ده البلد كله بتقوله والهانم بنت أخويا سيرتها بقت على كل لسان هي والبيه الصغير إللي سايب شغله وأهله وعايش هنا عشان بيتسلى وياخد مزاجه من الهانم.


شحب وجهها كشحوب الموت، وهي تهز رأسها بنفي:

– لا لا مش صح الكلام ده كدب.


كتف ذراعيه فوق صدره، وتحدث بنبرة حادة:

– ولما هو كدب رافضة العريس ليه يا بنت أخويا؟!


صاحت سمية بحدة:

– هي كانت تعرفه عشان تقبله ولا ترفضه؟!


تجاهل الرد عليها، وعينيه ظلت مرتكزة فوق ابنة أخيه:

– قُلتِ إيه يا بنت أخويا.


ظلت واقفة جثة صامتة وشريط حياتها يمر أما عينيها موت والديها، حب الخاطئ لعمر، معاملته السيئة، حديث عمر مع والده، والآن ما يقوله عنها عمها يشكك بها وبأخلاقها فإذا كان هو يشكك بها وهي عرضه ودمه فلن تلوم على غيره، ماذا ستفعل؟! ترفض العريس؟! ولكن لمَا ولأجل من؟! عمر يراها خادمة فقط ولن تقابل طرقهم من جديد ووجودها هنا أصبح غير مناسب الآن فليس أمامها سوا سبيل واحد.


نظرت إلى عمها، وتساءلت بجدية:

– العريس ده يعرفني منين؟!

الأعمال الأصلية لرواية وحكاية

اتسعت ابتسامته حتى ظهرت أسنانه الصفراء المتراصة في فمه بعناية:

– شافك وعجبتيه هو ساكن قريب من هنا وكان لسه راجع من بلاد الخواجات سأل عنك وجه طلبك مني هل نقول مبروك؟!


تنهدت بارتياح حسنًا هناك من يريدها لأجلها لم يهمه من تكون أو ماذا تفعل فماذا تريد أفضل من هذا؟! سيكون لها سند في إطار شرعي، وستمكث في بيت زوجها وسيصبح بيتها، وينفق عليها من ماله الخاص لأنها زوجته ليس مجرد شفقة، وستأثر لكرامتها التي بعثرها عمر أسفل قدميه إذا كان هو لا يريدها فهناك غيره يتمنى قربها.


أخذت نفس عميق، وهتفت بنبرة حاسمة:

– موافقة.


هلل بفرحة وهو يتجه إلى حقيبتها الموضوعة أرضًا ويحملها ويمد يده يجذبها من أحضان سمية بلهفة:

– أيوه كده يا عروسة هو ده الكلام يلا معايا على بيتي يلا.


تحرك سريعًا وهو يجرها خلفه، وهي تتحرك خلفه بآليه كما لو كانت شاه تساق إلى ذبحها..

❈-❈-❈


لم يطرف له جفن طوال الليل، ظل حالسًا جوارها يطالعها وهي غافية يخشى أن تكون حلمًا جميل ويستيقظ منه كعادته، ولكنها الآن حقيقة وواقع ملموس أضحت زوجته ولن يستطيع أحد أن يفرق بينهم حتى لو كان من فهو لن يفرط بها حتى لو طلبت هي ذلك، فبدونها كان جسًا فانيًا يعيش حياته كالإنسان الآلي ينفذ المهام المطلوبة منه فقط، ولكن بحضرتها عادت الروح والحياة إلى جسده، تأمل رأسها الحليق بحزن شديد بعد أن وقع الحجاب من فوق رأسها أثناء نومها، دمعت عينيه بألم لو كان بيده لأقتلع المرض من جسدها وغرسه بجسده هو.


لاحظ هو تململها فنهض سريعًا وتوجه إلى الأريكة وتمدد فوقها وأغلق عينيه على الفور وتظاهر بالنوم فآخر ما يريده الآن أن يسبب لها احراج.

الأعمال الأصلية لرواية وحكاية

فتحت عينيها بتثاقل شديد وقع بصرها على آصف الغافي فوق الأريكة، ابتسمت بوهن كم تمنت قربه في الماضي لو كان الأمر بيدها ما كانوا وصلوا إلى هنا، اعتدلت بحذر شديد كي لا يستيقظ وجدت غطاء رأسها ملقى جوارها حملته بلهفة وقامت بوضعه فوق رأسها فهي تخشى أن يستيقظ ويراه مرة أخرى هي لا تريد أن ترى نظرات الشفقة والاشمئزاز بعينيه هو تحديدًا، هبطت من فوق الفراش وعينيها مرتكزة فوقه وجدته يتململ هو الآخر ويفتح عينيه ويطالعها بابتسامة حانية:

– صباح الخير.


خفضت رأسها بخجل، ورددت:

– صباح النور.


اعتدل بتثاقل شديد ونهض من فوق الأريكة، وتهادى بخطواته تجاهها ووقف في مواجهتها، رفع يده وقربها منها مما جعلها ترتعد وتتراجع إلى الخلف بارتباك، رمقها بعتاب ومد يده الأخرى وثبتها من ذراعها وهمس بصوت خافت:

– أهدي.


اطمأنت من نبرته الحانية، فتبسم هو بحنان وقام بجذب غطاء رأسها على حين غفلة، مما جعلها تشهق بصدمة:

– بتعمل إيه؟!


ألقى الغطاء جانبًا، وتحدث بنبرة هادئة:

– موچ مش عايزك تغطي رأسك تاني سمعاني ولا لا؟! أنا بحبك في كل حلاتك سواء كنتِ حلوة أو وحشة، سواء بشعر أو من غير شعر.


أشار إلى رأسه، وهتف بمرح:

– وبعدين عيب عليكِ ما أنا كمان أقرع ولا مش واخدة بالك؟!


حدقت في الأرض، وهمست بحزن شديد:

– إنتَ حالق شعرك عشان شغلك يعني بمزاجك لكن أنا…


قاطعها بحدة:

– إنتِ زي الفل يا موچ هتعملي العملية وهتخفي وترجعي زي ما كنتِ وأنا جنبك ومش هسيبك لآخر نفس فيّ بمزاجك أو غصب عنك.


ألقى جملته على مسامعها، وتخطاها وتوجه إلى الشرفة لكن أوقفه صوتها الهامس:

– شكرًا.


– مفيش شكر بينا لأن ببساطة إحنا شخص واحد روح في جسدين يا موچ.


أجابها دون أن يلتفت إليه، وأكمل طريقه إلى وجهته، بينما تمتمت هي براحة:

– اللهم لك الحمد والشكر على نعمتك التي أنعمت عليّ بها.

❈-❈-❈


خرجت من المرحاض بعد مدة وجدت إلياس مستيقظ، ويجلس فوق الفراش وعلى يبدوا أنه شارد في أمر ما فهو لم ينتبه إلى خروجها من المرحاض ولا حتى وقوفها أمامه الآن.


تنحنحت بحرج حتى ينتبه لها:

– إحم إحم.


انتبه عليها، والتفت إليها بابتسامة:

– صباح الخير.


ابتلعت ريقها، وهتفت بابتسامة مقتضبة:

– صباح النور.


نهض من مكانه، وتوجه إليها وتساءل باهتمام:

– أحسن الوقتِ؟!


أومأت بايجاب:

– الحمد لله.


تنهد بارتياح، واستطرد قائلًا:

– نمتي كويس؟!


أجابت بعفوية:

– دي أول مرة أنام بعمق كده من زمان.

الأعمال الأصلية لرواية وحكاية

اتسعت ابتسامته وهلل بمرح:

– أيوه بقى على الكلام حلو عارفة معنى كلامك إيه؟!


عضت شفتيها بخجل، وحدقت في أرضية الغرفة أسفلها بتوتر، فاسترسل هو حديثه بجدية:

– معناها أنك حاسة معايا بالأمان أتمنى ده يفرق معاكِ فعلًا وتعرفي إن أنا سندك وأمانك ومفيش تفاعل حد هيقدر يقرب منك أو يأذيكي وأنا جنبك.


ابتسمت بامتنان لكن ابتسامتها لم تدوم عندما استرسل حديثه بنبرة لم تستطع تفسيرها، أهي عادية أم تنبيه أم رسالة تحذيرية:

– ومحدش يقدر يبعدك عني أو يقربك مني غير أنا وبس. 


أخذ نفس عميق يعبأ به رئتيه، وتحدث بنبرة هادئة:

– هروح أخد شاور وأغير هدومي على ما الفطار يجهز تحبي نفطر هنا ولا ننزل تحت؟!


رفعت كتفيها باللامبالاة ورددت:

– على راحتك.


ابتسم بهدوء وقال:

– خلاص نفطر هنا النهاردة عشان تبقي على راحتك بعد إذنك…

❈-❈-❈


جلس الجد إلياس في الحديقة يرتشف قهوته وبرفقته عمر الذي يتصفح هاتفه بذهن شارد….


وضع الفنجان فوق الطاولة، وطالع حفيده بنظرات ثاقبة:

– إيه إللي واخد عقل يا دكتور؟!


أغلق الهاتف ونظر إلى جده وتنحنح بحرج:

– مفيش حاجة يا جدو.


اعتدل الجد في جلسته، وتحدث بنبرة هادئة:

– أنا عارف إن سفر والدك ووالدتك فارق معاك إنتَ وأختك من زمان لكن والدك حابب العيشة بره وأسس شغله بره ونوح ورهف كانوا قاعدين معاهم وكملوا دراستهم بره وإنتَ وغنى فضلتوا هنا يمكن أه كنتوا بعيد عنهم لكن مرات عمك كانت ونعم الأم ليكم وأنا كنت دايمًا في ضهركم وده وإنتوا صغيرين وكنتوا محتاجين ليهم لكن حاليًا إنتَ كبرت وبقيت ودكتور جامعي ما شاء الله بطلع أجيال يعني مبقتش محتاج لوالدك ووالدتك زي زمان فاهمني يا عمر؟!



أومأ بتفهم:

– فاهمك يا جدي مش زعلان منهم بس مش حابب الفراق إمتى يستقروا هنا ونفضل كلنا سوا؟! أنا خايف بجد لقدر الله يحصل ليهم حاجة في الغربة أو هنا حد يحصل حاجة ونفترق.


تحدث الجد بهدوء:

– كل لن يصيبنا إلا ما كتب الله لنا المهم ناوي على إيه؟! مش ناوي تتجوز ولا إيه إنتَ ونوح باشا؟! آصف إللي أصغر منكم أتجوز.


تهرب من النظر إلى جده وردد بعدم اكتراث:

– ربنا يقدم إللي فيه الخير.


ضرب إلياس بقبضته فوق الطاولة وهتف بحسم:

– ما هو قدامك حل من اتنين يا دكتور يا إما تختار إنتَ عروستك بنفسك يا إما اختار أنا.


استنكر حديث جده وتساءل:

– مش فاهم أعتبر ده تهديد يا جدو؟!


أجاب بنبرة حادة:

– لا أمر يا دكتور….

❈-❈-❈


وفي نفس الوقت كانت تقف غنى أمام باب غرفة نوران تطرق على الباب دون فائدة، وفي النهاية قررت فتح الباب كي تدلف وتطمئن عليها، ولكن ما أن فتحت باب الغرفة حتى بهت وجهها وتراجعت عدة خطوات إلى الخلف بحيرة فالغرفة منظمة للغاية والفراش مراتب كما لو كان لم يمسه بشر، ثاور الشك قلبها فتوجهت إلى خزانة الملابس سريعًا وقامت بفتحها وجدتها فارغة، دبت على الأرض بغيظ وتمتمت:

– مفيش فايدة فيكِ يا نوران؟! مش فاهمة إيه إللي حصل ولا إيه إللي خلاكِ تمشي وتسيبي البيت بالشكل ده؟!


هرولت إلى الخارج وهي تردد بلهفة:

– أنا لازم أبلغ جدو وعمر بسرعة…

❈-❈-❈

وصل إلى بيته ونوران لا تزال خلفه، ظل يدق الباب بقوة حتى فتحت زوجته الباب وهي تصيح بحدة:

– الله مالك يا راجل عمال ترزع على الباب كده….


بترت جملتها ما أن أبصرت نوران تقف خلفه، ابتسمت بخبث:

– أهلًا أهلًا مش تقول إن العروسة معاك؟! اتفضلي يا عروسة اتفضلي بيتك ومطرحك.


استطردت متهكمة:

– معلش بقى البيت مش قد المقام يا سنيورة أصلك عايشة طول عمرك في قصر.


زجرها زوجها بحدة، وهو يقوم بإدخال نوران إلى الداخل بغيظ:

– أخرسي خالص يا ولية وخدي نوران دخليها ترتاح وأنا رايح أبلغ العريس البشارة.


مصمصت شفتيها بحركة سوقية بعد أن شملتها بنظرة ساخرة من أعلى رأسها لأخمص قدميها:

– روح يا أخويا روح بلغه إن ست الحسن والجمال وصلت ولو عايزة ياخدها من الوقتِ يجي خلي إللي يحمل يشيل.


زفر بضيق وغادر سريعًا، وهو يتمتم بغيظ:

– ربنا ياخدك يا بعيدة ويخلصني منك.


أغلقت إعتماد الباب، واستدارت إلى نوران التي تقف في منتصف البيت شاردة الذهن لا تدري ما فعلته صواب أن خطأ، كل ما تعلمه أنه السبيل لها.


تبخترط بخطواتها وتحركت تجاها وهي تنظر إلى ملابسها بغيظ دفين، ناهيك عن جمالها الخلاب الذي ورثته عن والدتها اللعينة كم كرهت والدتها تلك، وكانت أسعد الناس بوفاتها ومن سوء حظها أن تكون ابنتها صورة طبق الأصل منها، امتعض وجهها وصاحت بانزعاج:

– هتفضلي واقفة تبحلقي كده في البيت؟!


أغمضت عينيها لثوانٍ في محاولة منها لاستدعاء الصبر، وفتحتها مرة أخرى وتحدثت بثبات:

– المفروض أعمل إيه؟!


تخصرت الأخرى وهي تحرك رأسها بغنج:

– بصي بقى يا حلوة البيت زي ما إنتِ شايفة يضرب يقلب وكتب كتابك خلاص مفيش وقت فإنتِ زي الشاطرة كده تروحي تغيري اللبس ده وتلبسي جلابية من عندي وتمسكي البيت ده تقلبيه فوقاني تحتاني عايزاه يلمع سامعة ولا مش سامعه يا عروسة؟!


ابتلعت ريقها بمرارة وردت:

– سامعة حاضر يا مرات عمي.


ابتسمت الأخرى بزهو وربتت على ظهرها:

– أيوه كده شاطرة ورايا يلا عشان تلحقي تخلصي شغل وتعملي الغداء كمان لتكوني فاكرة إنك هتقعدي الكام يوم دول برنسيسة وأنا أخدمك لا يا حبيبتي إنتِ هتقعدي هنا بلقمتك.


تهادت في مشيتها غير آبهة، وتلك المسكينة نوران تقتفي أثرها خانعة ذليلة، تتجرع كأس اليتم والحرمان المقطر من أيدي من كُتب عليهم أن يكونوا عائلتها وملاذها.

❈-❈-❈

في الشرفة الخاصة بجناح أوس كان يجلس برفقة مرام التي تحمل طفلها يتناولوا وجبة الإفطار في جو عائلي….


كانت مرام منهمكة في إطعام زين باهتمام شديد ولم تتناول هي شيء ظل يتأملها لدقائق من يراهم يظن أنها أم وطفلها، وليس زوجة أب وابن زوجها، أغمض عينيه بحزن شديد بعد أن رمق طفله بأسف فهو أساء إختيار الأم له، لا يدري لما تفعل ذلك؟! أو ماذا تريد من الأساس يعلم أنها تبغضه وزوجها منه كان رغمًا عنها حتى طفلهم هذا جاهدت ألا يأتي على الدنيا لكن إرادة الله كانت أقوى، لما لا تحبه وتعمله بحنان؟! أين غريزة الأم لديها؟! 

الأعمال الأصلية لرواية وحكاية

فتح عينيه ببطء، وكأن ثقلاً هائلًا قد جثم على صدره وظل ناظرًا إليهما مجددًا. كانت مرام تمسح وجه الصغير بمنديل ورقي برفق بالغ، وتهمس له بكلمات ضاحكة لم يستطع تبينها، بينما بادلها زين ابتسامة بريئة.


ابتسم بهدوء وقال:

– هتفضلي تأكلي زين باشا كده كتير شبع خلاص؟!


ضيقت عينيها وتساءلت بحذر:

– أوعى تكون غيران من ابنك يا أوس؟!


انفجر ضاحكًا وهو يردد:

– يا روحي أنا غيران عليكِ من نفسي أصلًا، بس أنا قصدي الولد خلاص شبع كلي إنتِ كمان.


أومأت بايجاب:

– حاضر أنا بعد الفطار هروح لطنط هالة عشان عايزاني معاها نطلع نبارك للعرسان.


رد باختصار:

– تمام.

❈-❈-❈


قطع حديثه مع جده رنين هاتفه، نظر إلى الشاشة وقطب جبينه بحيرة وهو يطالع رقم الخادمة بتعجب، وأجاب:

– ألو أيوه يا داده خير؟!


انتفض من مكانه بصدمة:

– إنتِ بتقولي إيه؟! عريس مين وعم مين إللي خدها؟! نوران هنا أنا متأ….


بتر حديثه عندما لاحظ شقيقته تهرول تجاههم وهي تردد بلهفة:

– يا جدو يا عمر نوران سابت البيت.


نهض الجد من مكانه مرددًا بعدم تصديق:

– نعم سابت البيت إزاي؟! اتجننت دي ولا إيه؟!


ظل يطالعهم بصدمة، ولا يزال يستمع إلى صوت سمية في الطرف الآخر حتى أنهت حديثها وتحدث بنبرة حادة لا تقبل النقاش:

– مسافة الطريق وأكون عندك سلام 


أغلق الهاتف معها ونظرات جده وشقيقته مصوبة تجاهه، تحدث الجد باهتمام:

– خير يا عمر في إيه؟!


صاح بانفعال:

– الهانم مش بس سابت البيت ومشيت لا عمها جايب ليها عريس ووافقت وأخدها معاه بيته كمان.


استنكر الجد إلياس الحديث:

– إيه التهريج ده؟! إزي تعمل كده؟! كل ده يحصل من غير علمي؟! أنا هروح أشوف الهبل ده؟! 


أوقفه عمر باحترام:

– خليك إنتَ يا جدو حضرتك مسافر ومحتاج ترتاح قبل السفر أنا هروح أحل الموضوع.


هتفت غنى بلهفة:

– أنا هاجي معاك.


أومأ بايجاب:

– تمام.


ربت الجد على كتفه بخفة وقال:

– ماشي يا عمر حل الموضوع ده بعقل ولو احتاجت حاجة كلمني.


هز رأسه بايجاب:

– حاضر يا جدو يلا يا غنى.


تحرك سريعًا ومن خلفه شقيقته أستقل سيارته وهي إلى جواره وقادها بأقصى سرعة لديه وكل ما يدور في عقله الآن من هذا العريس؟! ومن أين يعرفها؟! وكيف توافق من الأساس….

❈-❈-❈


يجلس في الحديقة يتفحص الجريدة وبرفقته زوجته ونجله يعبث في هاتفه، اقتربت منهم الخادمة وهتفت باحترام:

– في واحد اسمه سعد عايز يقابل حضرتك يافندم.


امتعض وجهه وهتف بضيق بعد أن رمق نجله باستياء:

– خلي يجي.


غادرت الخادمة باحترام.


أعتدل وليد في جلسته وتساءل باهتمام:

– الراجل ده عايز إيه؟!


زفر والده بغيظ:

– أهو الوقتِ نعرف.


تساءلت والدته بفضول:

– هو مين ده؟!


نظر إليها زوجها بغيظ:

– ده يبقى نسيب ابنك.


امتعض وجهها وصاحت بانزعاج:

– هو ده نسب؟! أنا ابني يتجوز خدامة؟! مش عارفة هوري وشي للناس إزاي؟!


قلب عينيه بملل:

– وأنا مالي ومال الناس المهم عجباني أنا.


اقترب منهم سعد وهتف بحماس:

– السلام عليكم ورحمة الله وبركاته.


ردد الجميع:

– وعليكم السلام ورحمة الله وبركاته.


تساءل عبدالله بامتعاض:

– خير يا سعد في حاجة؟!


حرك رأسه بايجاب وأجاب بحماس:

– نوران رجعت من السفر يا باشا وروحت جبتها وعرفتها موضوع الجواز ووافقت كمان.


اتسعت ابتسامة وليد بحماس:

– بجد وافقت؟!


رمقه والده بغيظ:

– هو إنتَ مكنتش عايزها توافق ولا إيه؟!


تجاهل حديث والده ووجه حديثه إلى سعد:

– طيب أنا عايز أشوفها وأقعد معاها شوية.


نظر إليه سعد بتردد:

– أه تمام يا باشا بس ساعتين تلاتة بس على ما ترتاح من السفر.


أومأ بتفهم:

– خلاص هاجي ليكم بعد العصر بإذن الله.

الأعمال الأصلية لرواية وحكاية

تحدث عبد الله بحسم:

– الفرح في ميعاده يا سعد.


هتف بلهفة:

– حاضر يا باشا كل حاجة في ميعادها بالاذن أنا.


غادر سريعًا تتبعها نظرات عبدالله وزوجته الممتعضة، بينما نهض وليد وغادر إلى غرفته وعلى شفتيه ابتسامة ماكرة…

❈-❈-❈


في قصر إلياس أشرفت هالة على إعداد إفطار العروسين بنفسها وبعدها أمرت الخادمات بحمل صواني الإفطار وصعدت إليهم وبرفقتها مرام ووالدة عمر ورهف بعد أن رفضت سيرين أن تأتي معهم، اتجهوا إلى جناح إلياس أولًا طرقوا الباب، وانتظروا حتى فتح لهم الباب بعد دقائق يرتدي ترنج رياضي من اللون الرمادي وضمته والدته بحب وهي تبارك له:

– مبارك يا حبيبي.


قبل جبهتها بحب، وتبعها بتقبيل يدها:

– الله يبارك فيكِ يا ست الكل.


قدمت له مرام وزوجة عمه ورهف المباركة، واقتربت منهم وتين مرتدية عباءة استقبال من اللون الذهبي وحجاب من نفس اللون ضمتها هالة بهدوء وقالت:

– مبارك يا بنتي.


ردت بخجل:

– الله يبارك في حضرتك.


سلم عليها البقية وقدموا لها المباركة، وقامت الخادمة بوضع الطعام وبعدها استأذنوا وغادروا متوجهين إلى جناح آصف.


طرقت الباب وفتح لها الباب مرتديًا ترنج رياضي من اللون الأسود وضمها بحب وقبل رأسها ويدها، وقدم له البقية التهاني والمباركات.


وكذلك خرجت لهم موچ مرتدية عباءة استقبال من اللون الأوف وايت وحجاب من نفس اللون قدموا لها المباركة ووضعت الخادمة الإفطار وبعدها غادروا كي يتركونه بمفردهم…

❈-❈-❈


مر ثلاثة ساعات كاملة وهي منهمكة في تنظيف المنزل كما طلبت منها زوجة عمها، وأحضرت طعام الغداء لهم أيضًا وبعدها توجهت إلى الغرفة التي خصصتها لها زوجة عمها كي تمكث بها والتي لم تكن سوى غرفة خزينة لا تحتوي على فراش ولا أريكة كل ما فعلته قامت بفرش غطاء فوق الأرضية الباردة ووسادة كي تغفو عليها، ابتسمت بمرارة على حالها وإلى ما وصلت إليه، وما كادت أن تجلس أرضًا كي تستريح استمعت إلى صوت دقات على الباب، نهضت من مكانها وفتحت الباب وجدت عمها.


تحدثت باحترام:

– خير يا عمي؟!


هتف بحماس:

– غيري هدومك الوقتِ عريسك جاي الوقتِ عشان يقابلك.


شحب وجهها وتساءلت بصدمة:

– يقابلني ليه؟!


رمقها بغيظ وتمتم بنفاذ صبر:

– هو إيه إللي هيقابلك ليه؟! مش هيبقى جوزك؟! انجزي يلا وحسك عينك تزعليه أو تغلطي فيه بكلمة سامعة ولا مش سامعة؟!


خفضت رأسها بحزن شديد:

– حاضر.


تركها وغادر، أغلقت هي باب الغرفة وتهاوت بجسدها على الأرضية الباردة وظلت تبكِ وتنتحب بانهيار وهي تردد:

– يارب الصبر من عندك…


نهضت من مكانها بتثاقل وقامت باستبدال العباءة البالية التي أعطتها لها زوجتها عمها وقامت بارتداء درس طويل من اللون البرجندي وفي المنتصف حزام من اللون الأبيض وقامت بلف حجاب من اللون الأبيض وبعدها جلست على الأرض تضم قدميها إلى صدرها….ظلت على هذا الوضع حتى استمعت إلى صوت طرق على باب المنزل مما جعل قلبها ينتفض بين ضلوعها من الخوف…. خاصةً عندما استمعت إلى ترحاب عمها بالضيف في الخارج.


 ثوان واقتحمت زوجة عمها الغرفة وهي تصيح بلهفة:

– قومي بسرعة العريس وصل قومي.


نهضت من مكانها بتثاقل شديد وتحركت إلى الخارج وهي تقدم قدم وتؤخر الأخرى حتى وصلت إلى الخارج، وجدت عمها يجلس برفقة شاب يعطيها ظهره ولم تستعلم ملامحه بجد.


نهض عمها بحماس ما أن رأها وهو يهلل بابتسامة:

– العروسة وصلت أهي يا عريس.

وعلى ذكر عمها لهويته، نهض هو الآخر واستدار إليها وهو يطالعها من أعلى إلى أسفل بانبهار شديد وهو يتفحص كل إنش بها دون خجل ودون أن يغض بصره، امتعض وجهها من نظراته الجريئة التي تكاد تلتهمها وتصنم جسدها مكانها وفجأة…..


« السابق

جميع الفصول

التالي »

يتبع

إلى حين نشر الفصل الجديد للكاتبة (زينب سعيد القاضي)، لا تنسى قراءة روايات وقصص كاملة أخرى على مدونتنا رواية وحكاية


رواياتنا الحصرية كاملة

إرسال تعليق

أحدث أقدم
متابعة القراءة
استكمل