قراءة رواية البطة السودا كاملة

تنشر حصريًا على مدونة رواية وحكاية قبل أي منصة أخرى

عمر خلص شغله وطلع على مكتب المشرف العمومي وخبط ع الباب 

المشرف اول ما شافه ابتسم وقال 

تعالى يا باشمهندس عمر ادخل 

عمر دخل وقعد 

المشرف 

ها تحب تشرب ايه 

عمر 

لا لا انا مش جاي اعطل حضرتك انا كنت حابب اعرف منك الوضع مش اكتر 

المشرف 

بص يا عمر انا اطلعت ع السي في بتاعك وعرفت سمعتك هنا في القسم والكل يشهد بكفاءتك 

عمر 

شكرا لحضرتك دي شهادة اعتز بيها يا فندم 

المشرف 

شوف يا عمر الكلام اللي هقوله ليك دا بيني وبينك من غير ما حد يعرف لو كنت عايز مصلحتك 

عمر

 انا سامع حضرتك

المشرف 

أشرف كان بيستغلك لصالحه يا عمر وفارق الراتب كان بياخده هو لنفسه ويحطه ف جيبه 

عمر بصدمة سكت شوية وبعدين قال 

الراتب ميفرقش معايا اوي قد ان محدش يستغلني يا فندم 

المشرف 

بالظبط كدا علشان كدا يا عمر انا هعملك قرار نقل من القسم هنا 

عمر 

ايه نقل!! 

المشرف 

انت تستحق تكون ف الشركة الأم مش ف الفرع هنا... هناك هتقدر تثبت نفسك وتترقى وتوصل لحلمك هنا مهما عملت هتفضل مجرد مهندس شغال بالأجرة انت فاهمني 

عمر 

فاهمك يا فندم بس فين الشركة الأم اعتقد بعيدة عن هنا 

المشرف 

ايوا يا عمر هتضطر لو مش معاك عربية انك تسكن هناك 

عمر 

لا مش معايا عربية انا لسه يادوب اا 

المشرف 

تمام انا هعملك طلب نقل من غير ما اشرف يعرف وكمان هشوف ليك مكان كويس ولو مش هتقدر ع مصاريفه هحاول اشوف سكن للعمال وتسكن معاهم مفيش حل غير كدا 

عمر

ايوا بس دا معناه اسيب اهلي وابعد بعيد عنهم 

اشرف 

الطموح يا عمر يخليك تسافر المريخ متنساش 

عمر سكت 

المشرف 

شكلك متردد عامة فكر براحتك ووقت ما تاخد القرار تعالى واطلب مني انقلك .. تقدر تتفضل دلوقتي يا عمر 

عمر قام وقف وهو محتار ومتخبط ومش عارف يعمل ايه 

عن اذنك يا فندم 

...

في بيت ربا 

منار كانت زعلانة على ربا 

منار 

بابا ارجوك اتصرف اعمل حاجة ربا كدا هتتسجن سنة كاملة في السجن وسط المجرمات والعاهرات انت متخيل 

فريد 

انا وكلت اكبر المحامين علشان اقلل العقوبة اعمل ايه اكتر من كدا مش بإيدي 

منار

عاجبك اللي بيحصل دا يا ماما ربا هتتسجن بسببي انا وهي ملهاش ذنب 

انغام 

اومال انتي اللي تنسجني انتي بتستعبطي يا منار بطلي عبط واقفلي السيرة دي بقا... يعني ايه هتنسجن كم شهر وتطلع ونعوضها بفلوس او رحلة برا تنسى كل اللي حصل 

منار مكانتش مصدقة اللي بتسمعه من امها 

مش فاهمة حضرتك ليه كدا معاها هي دي مش بنتك 

انغام 

اعمل ايه مش حاساها عمري ما حسيتها لما تاهت كنت هتجنن هتهبل عايزة بنتي لكن مع الوقت اتعودت ع انها مش موجودة ومع ذلك كان نفسي اشوفها لكن لما شوفتها مكانتش زي ما كنت متخيلاها محستهاش لدرجة ان شاكة ان تحليل الدم مش مظبوط 

منار 

عيني عليكي يا ربا وعلى حظك 

انغام 

يووه فضونا من السيرة دي انا عايزة اكل يا دادا .. دادا فين الأكل 

منار سابت وجت تطلع اوضتها 

انغام 

على فين استني لما تتغدى 

منار 

مليش نفس كلو انتوا 

مر اسبوع ع ربا ف السجن كان من ابشع واسوء الفترات عليها كانت علطول بتعيط ودموعها مغرقة وشها لدرجة انها مكانتش شايفة اي حد من المسجونات اللي حواليها 

اما سماح كانت هتتهبل هتتجنن لاختفاء ربا صاحبتها خايفة يكون جرالها حاجة 

فبسرعة راحت للمحامي صاحبهم واللي بالصدفة كان مديره ماسك قضية ربا وعارف كل حاجة فبالتالي هو عرف هو كمان لكنه متكلمش 

سامي الحقني ارجوك انت اللي هتعرف تساعد ربا 

عمل انه مش عارف حاجة وقال 

ربا.. ربا مالها يا سماح خير 

سماح مختفية ومحدش راضي يدلني ع مكانها بالله عليك اسأل عنها واعرفلي هي فين مش انت بتحبها وكنت واعدها بالجواز لما ظروفك تتصلح ارجوك طمني عليها انا هموت من القلق 

سامي 

طيب ماشي ماشي هشوف الموضوع دا... 

سماح 

اللهي تنستر هجيلك بكرة اسالك عملت ايه ماشي 

سامي 

ماشي ماشي يلا امشي دلوقتي مش فاضي 

بصتله سماح بشك واستغراب 

وقالت ف نفسها وهي ماشية 

الواد دا اتغير من يوم ما بقا حتة محامي شغال ف مكتب كبير للمحاماة وواضح اوي انه مبقاش يحب ربا او اصلا مكانش بيحبها الواد دا ميستاهلهاش دا مقلقش عليها لحظة ولا اهتم كأني جاية اشحت منه كويس اني عرفته ما هو الانسان بيتعرف من المواقف 

خرجت سماح من المكتب وف طريقها واقفة توقف ميكروباص شافت منار اخت ربا نازلة من العربية بتاعتها وجاية تدخل المكتب

فجريت عليها 

اا يا هانم يا هانم لحظة بالله عليكي 

منار جت تطلع ليها فلوس من شنطتها امسكي بس ابعدي عني يقرف 

سماح بلعت الإهانة بصعوبة واتحاملت ع نفسها 

انا مش شحاتة يا هانم.. انا عارفة انك اخت ربا اا قصدي بطة .. ممكن بالله عليكي تقوليلي هي فين الله يسعد قلبك انا هموت من القلق عليها 

منار 

هي بطة تعرف الاشكال دي منين اه صح ما هي كانت متربية معاهم 

سماح 

اشكال!! صحيح ما انتوا مولودين وف بوؤكم معلقة دهب مشوفتوش الذل والمرمطة اللي شوفناها عايشين مطمئنين وسط امكم وابوكي بيحابوا ويدافعوا عنكم انما احنا بنتهان وننضرب ونتذل وملناش حد يحوش عننا هنقول ايه غير الحمد لله ربنا ليه حكمة ف كدا 

منار 

انتي عايزة ايه دلوقتي انا مش فاضية 

سماح 

عايزة اعرف ربا صاحبتي فين وديتوها فين هي مختفية بقالها يومين لا بترد ع موبايلها ولا ليها اثر 

منار 

اا ربا اا ربا صاحبتك اا سافرت ومش هترجع الا بعد سنة 

سماح بصدمة 

ايه سافرت ازاي وامتا من غير ما تقولي 

منار 

مش لازم تقولك انتي مين علشان تقولك يا ريت تنسي ربا بقا هي خلاص مبقتش من مستواكي اا بابا سفرها برا وقدم لها ف اكبر جامعة هناك وهي دلوقتي بقت ربا هانم يعني واحدة زيك مينفعش تجيب ف سيرتها كدا ولا تقول انها صاحبتي علشان لو سمعت الكلمة دي هقاضيكي انتي فاهمة 

سماح كانت واقفة مصدومة 

سافرت!! من غير ما تقولي!! هل فعلا كلام اختها صح... انا مينفعش اعرفها بعد النهاردة؟؟؟ ربا معقول هتتبرى مني وتتخلى عني.. لا يا ربا مصدقش عنك كدا وخاصة اهلك مبيحبوكيش انا اللي بحبك يا ربا .

قالتها ودموعها نزلت واتسمرت مكانها اما منار فكملت ف طريقها ودخلت للمكتب وطلبت تقابل المحامي 

سامي للاسف هو مش موجود حاليا اقدر اخدم حضرتك ف حاجة 

منار 

لا خلاص هجيله وقت تاني 

سامي 

اا هو حضرتك جاية بخصوص اختك الانسة بطة 

منار 

انت تعرف قضيتها 

سامي 

ايوا يا انسة ومتابعها مع استاذ مدحت 

منار 

طيب ممكن تحاول تخفف الحكم شوية عنها ارجوك 

سامي للاسف هي اخدت اخف حكم كل اللي اقدر اعمله اني اوصي عليها ف السجن محدش من السجينات يأذيها ويدخلها اكل كويس 

منار 

اه اه بليز بالله عليك 

سامي 

حاسة بالذنب ناحيتها 

منار بلعت ريقها 

اا انت بتقول ايه 

سامي 

انا عارف كل حاجة وانا اللي اقنعت ربا انها توافق تدخل بدالك انتي بسكوتاية مش هتتحملي ليلة واحدة بس كله بحسابه ممكن ربا تزهق وتتكلم 

منار 

اا انت عايز ايه 

سامي 

ولا حاجة عايز بس اسكتها وكمان علشان اوصي عليها السجينات ويدخلها اكل كويس دا محتاج بردو وكلك مفهومية يا هانم 

منار 

ااا ١٠ الاف جنيه كويس 

سامي بطمع 

دا يادوب شهر واحد ما بالك بسنة 

منار اا طيب خلاص هجيبلك زيهم كل شهر اتفقنا 

سامي واللي يثبت ايه يا انسة ما يمكن تديني شهر وبعد كدا تقولي معرفكش 

منار ااا انت عايز ايه اللي يثبت مش فاهمة 

سامي اقرار خطي مكتوب منك انك ملزمة كل شهر بدفع ١٠ الاف جنيه 

منار 

اا اوك اوك 

سامي 

بس الكلام دا سر لاحسن لو مجدي بيع عرف هيكبر الليلة عليكم لانه طبعا ليه اسمه وعايز حسابه لكن انا عامل اكرامية ليكي وما بينا وبين بعضينا هوصي عليها ف السجن من ناس اعرفهم ف السجن نفسه 

منار 

خلاص تمام اوك اكتب الاقرار وانا همضي

سامي بمكر 

كنت عارف انك هتكوني وش السعد عليا يا ربا واختك العبيطة دي اما هعرف ازاي استغلها كويس علشان اعوض اللي عملته فيكي  

...

عمر فضل اسبوع مش عارف ينام كويس من كتر التفكير 

مش عارف اعمل ايه هل اسافر واسيب الناس الطيبة اللي ربتني وهي ف عز حاجتهم ليا خلاص كبروا ف السن مبقاش ينفع اسيبهم لوحدهم لكن الراتب اللي باخده قليل ومش هيكفي احوش منه قرشين لقدام .. ولا اسافر وابعد عنهم واكون نفسي ونسدد كل اللي علينا بس ف الوقت دا هبعد عنهم مش عارف حقيقي مش عارف اعمل ايه وبعدين بقا في الحيرة دي

في الوقت دا سمع صوت سامية امه بتنادي عليه 

يا عمر يا عمر تعالى اشرب الشاي معانا 

قام عمر من مكانه بتثاقل كبير وخرج ليهم ولما شاف كوباية ع الترابيزة رفع ايده وخدها وشربها مرة واحدة 

فلما جت سامية وف ايديها صينية عليها كوبايتين شاي وجت تحطهم ع الترابيزة فلقت كوباية النعناع فاضية 

فقالت هو ابوك قام شرب النعناع!! 

عمر بصدمة 

ايه دا هي الكوباية كان فيها نعناع؟؟ 

سامية 

ايوا ابوك بيشتكي من بطنه بقاله فترة قولت اعمله نعناع يمكن يريحه شوية 

عمر فضل يهرش لانه عنده حساسية من النعناع 

انا شربتها فكرتها شاي 

سامية باهتمام 

ايه اللي شاغل بالك يا ابني خلاك كدا مش عارف تفرق بين الشاي والنعناع ولا حتى عرفت تفرق بينهم ف الطعم 

عمر بهم 

مشاكل في الشغل يا امي 

سامية 

مشاكل الحياة عمرها ما بتخلص يا عمر بلاش تخليها تغلبك بالشكل دا... ودايما ارفع ايدك وقول يا هم عندي رب كبير 

عمر 

محتار يا امي ومش عارف اخد قرار 

سامية 

شاركنا فيه يا عمر واحنا معاك يا حبيبي 

ولسه عمر هيتكلم ويقولهم تساعده يعمل ايه يسيبهم ويسافر لشغله ولا يفضل ف شغله هنا ويفضل معاهم لكنهم سمعوا صوت صرخات لناجي خارجة من اوضته 

فجريوا بسرعة عليه لقوه واقع ف الارض وبيتألم 

عمر 

بابا فيك ايه .. ايه اللي حصلك 

سامية 

يا مصيبتي مالك يا حج ربنا يسترها يارب 

ناجي بصعوبة 

مغص مغص شديد هيموتني مش قادر اتحمله اااه اااه اااه 

هنا عمر كان هينجنن هو وسامية 

فقرر يشيل ابوه ونزل بيه تحت وهو بيقول 

اقفلي الشقة وهاتي فلوس معاكي يا ماما وحصليني تحت لحد ما اشوف عربية بسرعة 

سامية وهي بتسابق الزمن 

ماشي يا ابني انا هحط جلابيتي عليا واجيب فلوس وانزل وراكم علطول 

وبالفعل لما نزلت كان عمر عرف يلاقي عربية بس كانت نص نقل وشال فيها ابوه ركبه وركبت سامية جنبه 

وهو نط ركب ورا في صندوق العربية وخبط على العربية 

سوق بسرعة يا اسطى ع المستشفى الله يكرمك 

ولما وصلوا للمستشفى وقدروا يوصلوا للدكتور وتم فحصه الدكتور قال 

محتاج يعمل عملية الزايدة حالا مينفعش يتأخر اكتر حاجة ممكن يتحملها ساعتين ٣ غير كدا فيه خطورة عليه 

عمر من غير تردد 

اعمل العملية يا دكتور مستني ايه 

الدكتور 

تمام احنا هنعمل التحاليل ونجهز الحالة بس العملية مش هتتعمل الا لما تدفع ٥ الاف جنيه ف خزنة المستشفى تحت 

عمر 

٥ الاف مرة واحدة!! اا احنا مكناش عاملين حسابنا والله 

الدكتور 

قدامك كم ساعة تقدر توفر فيهم المبلغ 

سامية اخدت عمر ع جنب 

متقلقش يا عمر معانا الحمد لله 

عمر 

منين يا امي وانا عارف البير وغطاه انا هروح لجيرانا واستلف منهم وربنا يهديهم ويوافقوا 

سامية 

يا عمر انا وابوك كنا حاطين قرشين ع جنب للزمن وليك علشان تكون بيهم نفسك ممكن تطلعهم علشان نفك الزنقة دي ونعمل العملية العملية لابوك 

عمر فرح 

يا فرج الله .. قوليلي هما فين بسرعة وانا اروح اجيبهم وخليكي انتي هنا معاه خدي بالك منه ع اما ارجع مسافة السكة 

سامية 

هتلاقيهم في الدولاب الكبير تحت المفرش في الدرفة اللي ع ايدك اليمين 

عمر 

ماشي هاتي المفتاح ومش هتاخر 

وبالفعل راح عمر وجاب الفلوس ورجعلهم وتم بالفعل إجراءات العملية 

وف وقت انتظار خروج ناجي من غرفة العمليات 

وهنا قرر عمر انه مش هيسيبهم ويروح للشركة الام لانهم محتاجين ليه في الوقت دا اكتر من اي وقت تاني 

....

وعدى سنة على الأحداث دي وجه وقت خروج ربا من السجن 

الفترة الصعبة اللي ف حياتها كانت كفيلة انها تغير شخصيتها تماما للنقيض من الأمل والطموح لليأس والاكتئاب 

كانت حاسة ان عمرها ما هتشوف النور من تاني 

ولما افرجوا عنها وخرجت من محبسها وقفت تبص حواليها بألم وحسرة 

واخيرا خرجت.. كنت مفكرة اني مش هخرج ع رجلي ابدا.. هه 

ضحكت بوجع 

وكالعادة مفيش حد ف انتظاري زي ولا مرة جم زاروني فيها من وقت ما دخلت السجن .. وانا اللي دخلت علشانهم ضحيت بسعادتي ومستقبلي علشانهم وف الاخر ولا اي حاجة محدش عبرني كالعادة 

اتفاجئت بعربية واقفة قدامها والسواق بيقول 

انسة بطة فريد بيه بعتني علشان اوصلك للبيت اتفضلي اركبي 

ضحكت بسخرية 

ياااه دا طلع فاكرني وفاكر هخرج امتا لا وباعت ليا السواق طب حتى كلف نفسك وتعالى استقبل بنتك 

بصت للسواق وقالت 

معلش مش ارجع ليهم انا مش هرجع معاك 

السواق 

يعني اقول لفريد بيه ايه 

ربا 

قوله اني رفضت اركب معاك ووقت ما احب ارجع هرجع لوحدي 

السواق باشفاق 

بس يا بنتي هتروحي فين وتيجي منين وترجعي لوحدك ازاي وانتي يا دوب لسه خارجة متملكيش مليم حتى 

ربا 

صح انت صح انا المفروض ارجع استعيد نفسي بعدين امشي والمرة دي لو مشيت من عندهم هتكون بلا رجعة 

وركبت ربا العربية 

ووصلها لحد البيت 

واول ما ربا دخلت البيت فكرت انهم هياخدوها بالاحضان ووحشتينا 

لكن فريد كان كله همه الصحافة فقال للسواق

ها طمني حد من الصحافة شافك ؟؟ 

السواق 

لا اطمن يا فريد بيه محدش كان موجود 

فريد الحمد لله 

ربا بسخرية 

ازيك يا بابا 

فريد 

اه اهلا يا بطة حمدا لله ع السلامة 

ربا 

الله يسلمك لسه فاكرني وبعتلي السواق فيك الخير والله دا انتوا ولا مرة جيتوا تزوروني انا فكرت نسيتوني ولا اتخلصتم مني 

فريد 

نيجي نزورك دا ايه والصحافة والسوشيال ميديا تشم خبر يبقى سمعتنا ف خبر كان لا طبعا... لكن انتي علطول فاكرينك ومش ناسيبنك 

هنا جت انغام 

حمدا لله على السلامه يا بطة 

ربا ببرود 

الله يسلمكم بعد اذنكم انا تعبانة ومحتاجة ارتاح اوضتي موجودة ولا ايه نظامها 

انغام 

كل حاجة زي ما هي يا بطة انا مش هنسى اللي عملتيه مع اختك 

ربا بسخرية 

طيب كويس والله 

انغام 

بس استني مش هينفع تطلعي فوق كدا انتي لسه خارجة من السجن وقاعدة مع ناس قذرة الدادة هتاخدك ع اوضتها وهناك هتنضفك وتاخدي شاور ولما يبقة كله تمام تقدري تطلعي ع اوضتك من تاني 

ربا اخدت نفس عميق ومشيت مع الدادة من غير ولا كلمة 

وف اوضة الدادة 

اخدتها ف حضنها 

حمدا لله ع السلامة يا بنتي وحشتيني اوي 

ربا اطلقت العنان لعينها وعيطت 

دادة واخيرا حد خدني في حضنه كنت محتاجة الحضن دا اوي .. كان نفسي يحضنوني يقولولي افتقدناكي لكن كل الاي قابلته مجرد برود وامتنان بسيط لاني ضحيت علشان بنتهم 

الدادة 

انتي بنتهم بردو يا ربا 

ربا بانفعال 

لا مش بنتهم مش بنتهم مش هنضحك ع بعض يا دادا انا مش بنتهم ابدا وعمري ما هكون... تعرفي انا وافقت ليه اني اضحي بحريتي وسعادتي ومستقبلي ودراستي وادخل السجن بدال منار.. كل دا علشان اشوف نظرة الرضا ف وشهم علشان انال حبهم علشان احس اني واحدة منهم بنتهم اللي اتحرمت منهم ... لكن للاسف دا محصلش والظاهر انه مش هيحصل ابدا علشان كدا انا مش هحاول معاهم تاني ولا هستنى منهم اي حد انا قررت اني امشي ابعد واسيبهم ف حالهم وامشي انا كمان لحال سبيلي 

الدادة بخوف 

هتروحي فين يا بنتي وانتي ملكيش حد ولا حيلتك حاجة 

ربا 

هرجع لسماح صاحبتي ونبدأ انا وهي سوا من الصفر .. هطلب من فريد بيه فلوس نظير تضحيتي لسنة من عمري وابدا بيه اي شغل اشتري شقة واشتغل واصرف ع نفسي بعيد عنهم 

الدادة 

ودراستك يا ربا يا بنتي هتسبيها كدا 

ربا 

خلاص يا دادا الظاهر مليش نصيب اني اكمل تعليمي وحلمي حياتي خلاص مات من وقت ما دخلت السن مش مهم بقا هعمل ايه نصيبي كدا اني مشوفش حلو في حياتي 

الدادة عيطت 

متقوليش كدا ربا بالله عليكي بلاش اليأس دا 

ربا بألم 

دا مش يأس دا واقع عيشتي هنا معاكم مبقاش ينفع خلاص 

الدادة طيب انا عندي فكرة ليه متطلبيش من فريد بيه انك تعيشي منفصلة عنهم في بيت لوحدك بس هو يصرف عليكي ما هو ابوكي .. زي ما بيعمل مع منار... سافرت وساكنة لوحدها برا وبيصرفوا عليها 

ربا بسخرية 

وهو انا زي منار بردو يا دادا 

الدادة 

جربي مش هتخسري حاجة هما هيفرحوا لما تبعدي زي ما بتقولي مش حسينك وسطهم بس ف نفس الوقت متقوليش همشي وانتوا مش اهلي .. قولي عايزة استقل بنفسي ف بيت لوحدي علشان معملكمش مشاكل وخاصة بعد ما دخلت السجن.. اكيد مش حابين حد يعرف اني بنتكم ب

فبلاش اظهر معاكم ف نفس المكان 

ربا بعد الحاح من الدادة وافقت ع الاقتراح دا وخاصة انها وسماح ف امس الحاجة للفلوس علشان يبدوا حياتهم سوا 

ولما ربا اخدت شاور وغيرت هدومها وظبطت نفسها والدادة جابتلها اكل واكلت 

خرجت و كلمت انغام فرحت كأنها اسعفتها فعلا بكلامها دا فقالت 

فكرة هايلة يا بطة يا حبيبتي انتي فعلا لازم تستقلي بنفسك بعيد عننا وبردو فريد مش هينساكي وهيخصص ليكي مصروف شخصي يساعدك على المعيشة 

ربا فرحت يعني هتجيبوا ليا شقة !! 

انغام 

طبعا فريد هيشتري ليكي شقة تكون بتاعتك تعيشي فيها ها ايه رايك يا ستي 

ربا 

شكرا اوي 

اتنهدت انغام براحة وقالت ف نفسها

يااه واخيرا هخلص منها كنت شايلة هم حد يعرف انها بنتنا وكانت ف السجن.. بوجودها بعيد عننا محدش هيعرف ابدا 

بعد كدا طلعت ربا ع اوضتها فلقتها زي ما سابتها نضيفة ومرتبة فابتسمت لانها عرفت ان الدادة هي اللي كانت بتنضفها وبتهتم بيها 

مسكت موبايلها فلقته فاصل شحن 

ولما حطته ع الشحن اول حاجة فكرت فيها هي سماح 

يا ترى سماح فين وليه محاولتش توصلي طول الفترة دي معقولة مكانتش تعرف اني ف السجن؟؟ ياااه يا سماح وحشتيني اوي مفتقداكي يا حبيبتي 

ولما طلبت رقمها لقته غير متاح حاولت تتصل كتير لكن نفس الرد الهاتف الذي طلبته غير متاح حاليا من فضلك حاول الاتصال في وقت لاحق 

فقررت انها تروحلها 

اخدت شنطتها ونزلت ركبت العربية وطلبت من السواق ياخدها للملجأ 

وهناك سألت عن سماح 

واحدة من اللي هناك 

يااه يا ربا عاش من شافك سماح مش هنا سماح سابت الملجا من سنة تقريبا 

ربا بصدمة 

ايه ليه حصلها حاجة اتكلمي سماح جرالها ايه 

البنت 

مش قصدي كدا قصدي انها قررت تعيش لوحدها سابت الملجا وقالت انها هتدور ع شغل وتستقل بحياتها لانها زهقت من عيشة الملجأ فالمديرة حطتها فلوسها اللي بيحوشوها لينا طول السنين دي كلها علشان سماح تبدا بيها حياتها 

ربا 

طيب مقالتش هي رايحة فين او تعرفي عنوانها حتى ولا رقم تلفون لان بطلبها غير متاح علطول 

البنت افتكرت كلام سماح 

فلاش باك 

وسماح بتسلم على الكل وبتودعهم 

اشوف وشكم بخير هتوحشوني لكن محبش اني ارجع ليكم تاني انتوا صفحة من حياتي وانفقلت 

وقالت ف نفسها 

زي ما ربا كانت صفحة من حياتي واتفقلت عطيتها كل حبي وقلبي لكنها مقدرتش دا يبقى متستحقوش بعد النهاردة 

وبصت للبنات وقالت لو ربا سألت عليا ف يوم من الايام قولولها انكم متعرفوليش طريق جرة ... اشوف وشكم بخير 

البنات 

مع السلامة يا سماح مع السلامه 

باااك 

البنت 

ها لالا معرفش عنها اي حاجة خالص راحت ومجتش من يومها ولا ظهرت 

ربا بأسى 

يعني ايه يعني مش هشوف سماح تاني... ياه يا سماح يا اغلى ما عندي.. انتي اللي كنتي بتهوني عليا قسوة الحياة طيب مين هيطبطب عليا وبنصحني من بعدك ليه استعجلتي ومشيتي من غيري انا كنت ناوية اخد الشقة ونعيش فيها سوا.. نواجه الحياة مع بعض مكنتش هشيل هم... دلوقتي انا لوحدي مش هقدر ليه كدا يا سماح تسيبيني وتتخلي عني انتي كمان ليه 

رجعت ربا للبيت زعلانة وحزينة وفضلت ف الاوضة مخرجتش منها غير لما فريد قالها انه وفر ليها الشقة وتقدر تنقل فيها من دلوقتي 

ف بالفعل قامت وبدات تجمع حاجتها كلها ف شنطة علشان تمشي ووقت ما فتحت درج المكتب وبدات تخرج كل اللي فيه لقت الكارت تبع شركة سليم وافتكرت لما قال يجوا ليه وقت ما يحتاجوا 

فبصت للكارت وقالت بتصميم 

يمكن جه الوقت اني استعين بيك ف اني الاقي شغل عارفة اني مش هلاقي شغل وانا مكملتش تعليمي بس حتى لو عاملة انا موافقة المهم اعيش بعرق جبيني ومحتاجش لحد

يتبع

إلى حين نشر الفصل الجديد للكاتبة  أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة‏